Psalm 98 - Edo Bible (E Baibol Ẹdo) Version 1996

Osanobua Ne Ọ khaemwisẹ Yan Agbọn

¹ Wa so ihuan ọgbọn ghe Nọyaẹnmwa, ọ ru emwi ọyunnuan nibun nẹ. Ọ vbe ya ẹtin kevbe iwegbe ẹre ne ọ huanrẹn, miẹn akhọnmiotọ nẹ.

² E Nọyaẹnmwa na iyẹn akhọnmiotọ ẹre, ọ vbe ya ẹtin akhọnmiotọ ẹre, khian ne a rẹnrẹn ne avbe uhunmwu ẹvbo hia.

³ Ọ ru zẹ vbene ọ ve ivbi Izrẹl re, vbe amuẹtinyan kevbe aho ne ẹ i beghe ne iran emwa hia ni rre ehe hia, miẹn akhọnmiotọ Osanobua mwa nẹ.

⁴ Wa so ihuan oghọghọ ghe Nọyaẹnmwa, wa ne otọe agbọn hia, wa ya ihuan kevbe uwemwẹ oghọghọ rho ẹre!

⁵ Wa so ihuan urhomwẹ ghe Nọyaẹnmwa; wa ye akpata kpe orhu ne ọ rhiẹnrhiẹn.

⁶ Wa kpe orhu kevbe okpe, ne uwa we uwemwẹ oghọghọ, ghe Nọyaẹnmwa ne ọba mwa.

⁷ Wa davan, wa ne okun, kevbe emwi ni rre uwu ẹre hia, agbọn, wa so ihuan, deba emwa hia ni rre uwu uwẹ!

⁸ Wa ne ẹzẹ, wa kpe obọ wa ne oke, wa koko ya oghọghọ so ihuan, vbe odaro Nọyaẹnmwa.

⁹ Rhunmwuda, ọ dee ra do kha yan agbọn, rẹn gha kha yan emwa ni rre agbọn na vbe ẹmwata kevbe a i ghe ikpanro.