Psalm 96 - Edo Bible (E Baibol Ẹdo) Version 1996

Osanobua Ọba Ne Ọ Yo Sẹẹ Ehia

¹ Wa so ihuan ọgbọn ghe Nọyaẹnmwa; wa so ihuan ghe Nọyaẹnmwa, agbọn na hia!

² Wa so ihuan ghe Nọyaẹnmwa, ne uwa rho ẹre; wa gha na iyẹn ne ọ maa ni ẹdẹgbegbe wẹ, Ọ miẹn ima fan nẹ.

³ Wa na iyẹn uyi ẹre ma avbe uhunmwu ẹvbo, iwinna ọyunnuan rẹn ma emwa hia.

⁴ Ọmwa ne ọ kpọlọ ọ re Nọyaẹnmwa khin, ọ vbe ke ne a kakabọ rho ẹre; te a gha rhie ọghọ ne ẹẹn sẹẹ avbe ẹbọ hia.

⁵ Amazẹ ọ re ẹbọ avbe emwa nekpa khin, sokpan, e Nọyaẹnmwa ọ re ọ yi ẹrinmwi.

⁶ Uyi kevbe oyọnyọn ọba gba ẹre egbe, ẹtin kevbe osẹ vuọn Ọgua Osa ẹre.

⁷ Wa rho e Nọyaẹnmwa emwa ni rre agbọn na hia, wa rho uyi kevbe ẹtin ẹnrẹn.

⁸ Wa rho eni Nọyaẹnmwa ne ọ mwẹ uyi, viọ emwi izọese rre ne uwa gha die Ọgua Osa ẹre

⁹ wa ghughẹrre vbe odaro ọmwa Ne ọ huanrẹn vbe ọ gha ya egbe ladian. Wa gha guọ zẹzẹzẹ vbe odaro ẹre otọ agbọn hia.

¹⁰ Wa tama agbọn ẹvbo hia wẹẹ, “E Nọyaẹnmwa ọrọre ọba! A mu agbọn na uhe sẹ otọ nẹ gbain vbe ihe ẹre, ai ghi sẹtin werriẹ ọe, ọ gha ye ẹmwata bu ohiẹn avbe emwa nii.”

¹¹ Wa gha ghọghọ otọe kevbe iso, wẹ davan, wẹ ne okun, deba avbe emwi ne a yi ni rre uwu uwẹ.

¹² Gha ghọghọ, wẹ ne oha, kevbe emwi hia ni rre uwu uwẹ! Avbe erhan ni rre uwu ẹgbo, gha wee ne oghọghọ.

¹³ Ẹghẹ ne Nọyaẹnmwa gha na do kha yan agbọn, rẹn gha kha yan emwa ni rre agbọn na vbe ẹmwata kevbe a i ghe ikpanro.