Psalm 95 - Edo Bible (E Baibol Ẹdo) Version 1996

Ihuan Urhomwẹ

¹ Wa larre, wa gie a rho Nọyaẹnmwa, wa gie a so ihuan oghọghọ ọghe Osanobua ne ọ degue mwa.

² Wa gie a ya ekpọnmwẹ gha die odaro ẹre ne a so ihuan oghogho ọghe urhomwẹ.

³ Rhunmwuda, Nọyaẹnmwa. Osanobua nọkpọlọ ọre nọ, kevbe ọba ne ọ kpọlọ sẹ ẹbọ hia.

⁴ Rẹn ọ khaemwisẹ yan agbọn na hia, kevbe uvun okuta ne ọ dinmwi sẹẹ, ya sẹ egbe oke ne ọ yo sẹẹ.

⁵ Rẹn ọ khaemwisẹ yan okun rẹn ọ vbe yiẹe kevbe otọe ne ọ kae ne irẹn vbe yi ba ẹre.

⁶ Wa larre, wa gie ima ghughẹ rre, ne a ya uhunmwu rhanmwẹ otọ ne ẹẹn, wa gie ima diguẹ ne Nọyaẹnmwa ne ayi Nọyimwa.

⁷ Rẹn ọrọre Osanobua mwa; ma ọrọre emwa ne irẹn gbearoghe, oghẹn ohuan ne irẹn koko. Ẹdẹnẹrẹ, wa danmwehọ vbene ọ kha hẹ:

⁸ “Wa ghẹ ze vbe udu, vbene avbe erha uwa ru vbe Mẹriba vbe ẹghẹ nii vbe iran rre ato Messa.

⁹ Evba iran na danmwẹ mwẹ ghe, ne iran miẹn otọ mwẹ, egbe ne iran rhe ya miẹn emwi ne I ru ne iran nẹ.

¹⁰ Ukpo iyeva ọre egbe iran na wa ya wọ mwẹ I keghi kha wẹẹ, ‘Ghe vbene iran sọtẹ hẹ; iran hee uhi mwẹ ye otọ.’

¹¹ Ohu keghi mu mwẹ ọre I na yan wẹẹ, ‘Wa i ra la otọe nii ne I gha na te rriẹ ikẹtin ne uwa.’ ”