Psalm 94 - Edo Bible (E Baibol Ẹdo) Version 1996

Osanobua Ne Ọbuohiẹn Emwa Hia

¹ Nọyaẹnmwa, Osanobua ne ọ rri ọmwa oya ye ọkhọ ọ re uwẹ khin; rhie izohu ruẹ maa!

² Wẹ ọ re ọ bu ohiẹn emwa hia kpaegbe, ne u ru avbe emwa ni tọn egbe mu emwi ne ọ ma iran.

³ Vbe avbe emwa dan gha ya ghọghọ kpee sẹ hẹ yi? Vbe ọ gha kpee sẹ hẹ Nọyaẹnmwa?

⁴ Vbe ọ gha kpee sẹ hẹ yi, ighe ẹghẹ ne avbe emwa dan gha ya gha hio ne iran gha ya emwi dan ne iran ru rhuọ?

⁵ Iran wa rẹnkhẹn emwa ruẹn Nọyaẹnmwa iran zẹ emwa ni re ọwuẹ kpokpo.

⁶ Iran gbele avbe ẹgbẹe kevbe emọ ne ẹ i mwẹ erha iran keghi vbe gbele avbe erriọvbe ni rre otọe mwa.

⁷ Iran khare wẹẹ, “E Nọyaẹnmwa ma bẹghe ima; Osanobua Izrẹl ma rhie aro yọ.”

⁸ Wa ne emwa mwẹ vbe uwa na kọn de ọzuọ a hẹ vberriọ yi? De ẹghẹ ne uwa gha ya rẹn emwi yi?

⁹ Osanobua ne ọ yi ehọ ima, ẹ i họn ẹmwẹ ra? Rẹn ọ re ọ yi aro ima, ẹ i bẹghe ra?

¹⁰ Rẹn ọ re ọ gbe aro ghe agbọn ẹvbo hia, ẹ i rri iran oya ye ọkhọ ra? Rẹn ọ re ọ ma emwa hia emwi rẹn i mwẹ irẹnmwi ra?

¹¹ E Nọyaẹnmwa rẹn iro ne iran zẹ; ọ rẹn vbene iro iran re ọghe akpa hẹ.

¹² Nọyaẹnmwa, afiangbe nọ ne ọmwa ne uwẹ ma ẹre emwi, ọmwa ne uwẹ ma ẹre uhi ruẹ!

¹³ U rhie ikẹtin ne ẹẹn vbe ẹghẹ ibaro, a te do tọn uye ya mu ọmwa dan vbe ifi.

¹⁴ E Nọyaẹnmwa i ra he emwa rẹn yotọ, rẹn i ra fi iyeke gbe iran ni re ọghọe.

¹⁵ A gha ye miẹn ẹmwata vbe uwu iko ibuohiẹn, emwa ẹmwata hia gha wa ya egbe ba ẹre.

¹⁶ De ọmwa ne ọ gu emwa dan gbinna mẹ yi? Gha ọ mu ẹzọ mwẹ gu emwa ọkhọ gui?

¹⁷ Akpawẹ ẹ i re Nọyaẹnmwa ne ọ mudia mẹ te I gha ya ulẹ lao otọe iran ni rhie obọ nọ fu yan egbe.

¹⁸ Mẹ khare wẹẹ, “Ghe vbe I ra de,” sokpan, ahoẹmwọmwa ruẹn ne ẹ i beghe keghi da mwẹ yi Nọyaẹnmwa.

¹⁹ Ẹghẹikẹghẹ ne udu mwẹ ya mu waa I na vbe gha hawa u ghi fu mwẹ ẹko rre u ghi ya mwẹ sẹ ọyẹnmwẹ.

²⁰ Wẹ kevbe ọmwa nọ bu ohiẹn, ne ọ guẹ emwi dan i sẹtin gba ru iran ni ye ohiẹn ohoghe khian ne ọ gbae.

²¹ Iran ni khuan khẹ emwa ẹmwata, ni bu abe uwu gbe ọmwa ne ọ ma rri abe.

²² Sokpan, e Nọyaẹnmwa ọ re ọ gbinna mẹ, Osanobua mwẹ ọ re ọ degue mwẹ.

²³ Ọ gha rri iran oya ye emwi dan ne iran ru, ọ gha fuẹn iran an ye ẹmwẹ orukhọ iran, e Nọyaẹnmwa, Osanobua mwa gha fuẹn iran an.