Psalm 92 - Edo Bible (E Baibol Ẹdo) Version 1996

Ihuan Urhomwẹ

¹ U miẹn vbene ọ maa hẹ ne a rhie ekpọnmwẹ ne uẹn Nọyaẹnmwa ne a so ihuan uyi ruẹ, Osanobua ne ọ yo sẹẹ Ehia.

² Ne a gha na iyẹn ahoẹmwọmwa ruẹn ne ẹ i beghe owiẹ owiẹ, kevbe aguobọ ọmwa ruẹn vbe asọn asọn.

³ Ne a gha ya emwi ihuan ne ọ mwẹ irri ru ẹe, kevbe ne ọ rhiẹnrhiẹn vbe akpata.

⁴ Iwinna ruẹn nekhua ya ẹko rhiẹnrhiẹn mwẹ Nọyaẹnmwa mẹ so ihuan oghọghọ rhunmwuda iwinna ne u winnaẹn.

⁵ A miẹn vbe iwinna ruẹn kpọlọ hẹ Nọyaẹnmwa! A miẹn vbe iro ẹko ruẹ dinmwi hẹ!

⁶ Emwi ne akpa i sẹtin rẹn ọ re ọna khin ọzuọ i sẹtin rẹn otọ ẹre,

⁷ ọmwa dan sẹtin wan vbe irunmwu agbọn sẹtin maa iran ni ru emwi dan, sokpan, a gha fuẹn iran fo fẹẹrẹ.

⁸ Rhunmwuda, wẹ ne Nọyaẹnmwa ọ re ọ sẹẹ emwi hia rhinrin ẹdẹ.

⁹ Ma rẹnrẹn wẹ, avbe eghian ruẹn gha wulo, kevbe wẹ obọ gha vba avbe emwa dan hia fẹẹrẹ

¹⁰ U ya mwẹ wegbe zẹ vbe ede, u ya oghọghọ we mwẹ nẹ.

¹¹ Aro miẹn ọẹn nẹ vbe obọ gba avbe eghian mwẹ, I vbe họn eve avbe emwa dan.

¹² Ọmwata gha wan zẹ vbe udin iran gha wan zẹvbe isida ni rre Lebanọn.

¹³ Te iran ye vbe erhan ne a kọ ye owa e Nọyaẹnmwa.

¹⁴ Ne ọ ye mọ vbe ẹghẹ ọmaẹn ne ẹbe ẹre bi nunuunu vbe ẹghẹ hia ọ ghi vbe wegbe.

¹⁵ Ọna rhiema wẹẹ ọmwata ọre Nọyaẹnmwa khin kevbe wẹ abakuru i vbe rre obọ ọmwa ne ọ gbe aro ghe mwẹ.