Psalm 90 - Edo Bible (E Baibol Ẹdo) Version 1996

EBE NE OGIENẸ ( Psalm 90—106 ) Vbe Ekpa Osanobua Kevbe Ọmwanagbọn

¹ E Nọyaẹnmwa, wẹ ọrọre owa mwa ẹdẹdẹmwẹdẹ.

² Vbe uwẹ te do yi avbe oke ra u te do ru ẹe ne agbọn gha rrọ wẹ ọrọre Osanobua etẹbitẹghori wẹ ọ re ọ vbe ra gha re Osanobua ẹdẹdẹmwẹdẹ.

³ Wẹ tama ọmwa, ne ọ werriegbe ghe emwi ne ọ ka khin u dọlegbe ya ẹe khian ekẹn.

⁴ Ikpẹdẹ arriaisẹn, te ọ yevbe ẹdẹ nodẹ, ne ọrhie gberra nẹ, zẹ vbe ovbi ẹghẹ kherhe, vbe asọn.

⁵ U viọ ima hia gha rriẹ zẹvbe amẹ ne ọ lẹ ma ma vbe kpee gberra, vbene imina ye. Ma yevbe irunmwu ne ọ zọrre vbe owiẹ

⁶ ọ na wan ọ na yuolo obobo ladian sokpan ọ kaka a vbe ota ọ keghi wu.

⁷ Ohu ruẹ fuẹn ima an, ohu ruẹ nọkhua runran mwa.

⁸ U wa orukhọ ima ye odaro ruẹ, orukhọ ẹkhokho ima vbe ehe ne u gha na gha bẹghe ẹre.

⁹ Ohu ruẹ, fian ẹdagbọn mwa kanmwa, ọ hoho ua, zẹ vbe ẹmwẹ ewẹwẹwẹ.

¹⁰ Ukpo ekigbesiyenẹ ọre ima mwẹ, deghẹ ma wegbe ọ ghi sẹ iyenẹ Sevba, akhiẹ kevbe ibaro ẹre iran rhie gie ọmwa; vbe ọ ma he kpẹe, ẹdagbọn mwa gberra, ma ghi gha rriẹ.

¹¹ De ọmwa ne ọ he ya egbe miẹn ohu ruẹ vbe uwu ẹtin ẹnrẹn hia? De ọmwa ne ọ rẹn ohan ne ohu ruẹ nọkhua sẹtin si rre?

¹² Ma ima re, vbene ẹdagbọn mwa kanmwa sẹ hẹ ne ima miẹn ehe na gha mwẹ ẹwaẹn.

¹³ Vbe ohu ruẹ ghi ra kpee sẹ hẹ vbe otọ yi? Nọyaẹnmwa, tohan avbe eguọmwadia ruẹ.

¹⁴ Ye ahoẹmwọmwa ruẹn ne ẹ i beghe vuọn ima owiẹ owiẹ, ne ima miẹn ehe na gha so ihuan, ne ọyẹnmwẹ vbe gha sẹ mwa vbe ẹdagbọn mwa hia.

¹⁵ Banbanna nian, rhie ọyẹnmwẹ ne ọ kpọlọ ne ima, vbe ẹghẹ usẹ mwa.

¹⁶ Gie ima ne eguọmwadia ruẹ miẹn iwinna ruẹn ni kpọlọ gie avbe ivbi mwa miẹn ẹtin ruẹn ne ọ mwẹ uyi.

¹⁷ E Nọyaẹnmwa Osanobua mwa gie afiangbe ruẹ gha rre ima egbe gie emwi ne ima ru hia dunna ne ima.