Psalm 9 - Edo Bible (E Baibol Ẹdo) Version 1996

Ekpọnmwẹ Ye Ohiẹn Ẹmwata Ne Osanobua Bu

¹ I gha ya ekhọe mwẹ hia rho ruẹ Nọyaẹnmwa. I gha na iyẹn emwi ọyunnuan hia, ne uwẹ ru.

² I gha ya oghọghọ so ihuan rhunmwuda ruẹ. I gha so ihuan urhomwẹ ghe ruẹ Osanobua ne Udazi.

³ Eghian mwẹ lẹ werriegbe vbe uwẹ ladian. Iran dele gbe otọ, iran keghi wulo.

⁴ Ohiẹn nọgbae, ne ẹi ghe ikpanro, ọre uwẹ bu, wẹ bu asẹ mẹ nẹ.

⁵ U bu abe gbe iran nigẹbọ nẹ, u vbe fuẹn avbe emwa dan an, ai ghi ye iran rre ọvbehe.

⁶ Avbe eghian mwa gbẹro nẹ ẹdẹdẹmwẹdẹ. U fuẹn ẹvbo iran an nẹ, a mianmian iran nẹ fẹẹrẹ.

⁷ Sokpan, e Nọyaẹnmwa ọrọre ọba ẹdẹdẹmwẹdẹ, ọ vbe mu ẹkete ibuohiẹn ọghọe gbọ nẹ.

⁸ Odẹ ẹmwata ọ re ọ ya khaemwisẹ yan agbọn na. Ohiẹn ẹmwata ọ re ọ bu ne agbọn vbọ.

⁹ E Nọyaẹnmwa ọrọre ehe ne iran na khu khian lẹ fi ehe ne ẹbe i ye vbe ẹghẹ ọlọghọmwa.

¹⁰ Nọyaẹnmwa, iran ni rẹn ruẹn gha mu ẹtin yan ruẹn. Wẹ i fi iyeke gbe ọmwaikọmwa, ne ọ lẹ bu ruẹ rre.

¹¹ Wa so ihuan ghe Nọyaẹnmwa, ne ọ khaemwisẹ vbe Zaiọn! Wa na iyẹn emwi ne ọ ru ma uhunmwu ẹvbo hia!

¹² Osanobua ye iran ne usẹ sẹ rre, ẹi vbe mianmian utumwẹ iran, ọ vbe rri iran oya ighe iran ni fidọn ghe iran.

¹³ Tohan mwẹ Nọyaẹnmwa. Ghe ọlọghọmwa ne avbe eghian mwẹ si yọmwẹ egbe. Fan mwẹ ye otọ vbe obọ uwu, Nọyaẹnmwa

¹⁴ ne imẹ miẹn ehe na mudia vbe odaro ivbi e Jerusalẹm. Ne I tama iran, emwi ne I rho ruẹ ba. I gha ghọghọ rhunmwuda, wẹ miẹn mwẹ fan nẹ.

¹⁵ Iran ni ma yayi dele ye uvun ne iran tọẹn. Ifi ne iran khuẹn munọ iran.

¹⁶ E Nọyaẹnmwa ye egbe ne a miẹn, vbekpa ohiẹn ẹmwata ne ọ bu. Iwinna dan ọghe emwa dan, khuẹn ifi mu iran.

¹⁷ Uwu ọrọre ne a zẹ khẹ emwa dan hia. Kevbe ọghe iran hia ni he Osanobua ye otọ.

¹⁸ A i ra mianmian ne ẹi mwẹ rhinrin ẹdẹ. A i ra vbe fuẹn idaehọ ovbiogue ua ẹdẹdẹmwẹdẹ.

¹⁹ Gha dee Nọyaẹnmwa, ghẹ gie emwa nagbọn yagha a. Viọ iran ni ma yayi mudia vbe odaro ruẹ, ne u bu ohiẹn iran.

²⁰ Runran iran Nọyaẹnmwa, gie iran rẹn wẹẹ, emwa ne ọ sẹtin wu kẹkan ọ re iran khin.