Psalm 89 - Edo Bible (E Baibol Ẹdo) Version 1996

Ihuan Ẹghẹ Ibaro Ẹvbo Hoho

¹ E Nọyaẹnmwa, mẹ gha so ihuan aho ruẹ ne ẹ i beghe vbe ẹghẹ hia, I gha na iyẹn aguobọmwa ruẹn ẹdẹdẹmwẹdẹ.

² Mẹ rẹnrẹn wẹ ahoẹmwọmwa ruẹn ọ ghe etẹbitẹ nọ, kevbe wẹ aguobọ ọmwa ruẹn te ọ ye gbain zẹ vbe iso.

³ Wẹ khare wẹẹ, “I gu ọmwa ne I hannọ zẹ ta ile nẹ; I tama Devid ne ọguọmwadia mwẹ nẹ wẹẹ,

⁴ ‘Ovbi uniẹn ruẹn ọ re ọ ra gha rri ọba khian. I gha gbe ẹbe gue uniẹn ruẹn ni rri ọba ẹdẹdẹmwẹdẹ!’ ”

⁵ Ẹrinmwi ya emwi ọyunnuan ne u ru so ihuan, iran ya aguobọ ọmwa ruẹn so ihuan, Nọyaẹnmwa.

⁶ Ọmwa ne ọ ye vbe ruẹ irre ẹrinmwi Nọyaẹnmwa, avbe ekamakodin ẹrinmwi ne ọ re ne uwa gba re ọkpa i rrọ.

⁷ Te a kpa uhe ne uẹn vbe iko iran ni huanrẹn te ohan ruẹn wa mu iran hia.

⁸ E Nọyaẹnmwa Osanobua ne Oghodua, ọmwa ne ọ mwẹ ẹtin vbe uwẹ i rrọ vbe uwu emwi hia Nọyaẹnmwa, te uwẹ gia mu ẹtin yan.

⁹ Wẹ ọ re ọ kha yan okun ne ọ wegbe, wẹ ọ re ọ dọ uhuemwẹ ọnrẹn ne ohu mu yọ.

¹⁰ U piẹn Rehab ne Ugbogiorinmwi, u keghi gbe ẹe rua, u ya ẹtin ruẹn nọkhua khọn, avbe eghian ruẹn muotọ.

¹¹ Wẹ ọ re ọ yan ẹrinmwi, kevbe agbọn ba ẹre, wẹ ọ re ọ yi agbọn kevbe emwi hia ni rre uwu ẹre.

¹² Wẹ ọ re ọ yi odẹ okuọ kevbe ekẹn Oke Tabọ kevbe Oke Hẹmọn iran hia ya oghọghọ so ihuan ghe ruẹ.

¹³ A miẹn vbene u mwẹ ẹtin hẹ! A miẹn vbene ẹtin ruẹn kpọlọ hẹ!

¹⁴ Ẹmwata kevbe uhunmwu ẹmwẹ, ọ re a gbe ẹyotọ arriọba ruẹ yan, aho ẹmwẹ ọmwa kevbe aguobọmwa, rhie egbe ma vbe emwi ne u ru hia.

¹⁵ Ọmakin iran ni so ihuan ya rho ruẹ iran ni rrọ vbe uwu uwanmwẹ itohan ruẹn.

¹⁶ Rhunmwuda uwẹ, ọ re ọyẹnmwẹ na sẹ iran ne ebi ro, iran ghi vbe gha rho ruẹ ba ẹmwẹ umamwẹ ruẹn.

¹⁷ Wẹ rhie akhọnmiotọ nekhua ne ima vbe aho ẹmwẹ ọmwa ruẹn, u ke gie ima khọnmiotọ.

¹⁸ Nọyaẹnmwa, wẹ ọ re ọ zẹ ọmwa ne ọ degue mwa, wẹ, Ọmwa Ne ọ huanrẹn Izrẹl, ọ re ọ rhie ọba mwa ne ima.

Emwi Ne Osanobua Ve Devid Re

¹⁹ Vbe ẹghẹ ne ọ kpee fua, u tama eguọmwadia ruẹ ni guobọ ruẹ vbe aro umian wẹẹ, “Mẹ rhie iyobọ ne ovbiyokuo ne ọ hin usi nẹ I vbe mu ẹkete nii ne ọmwa ne I hannọ zẹ, vbe uwu avbe emwa nii nẹ.

²⁰ I ya Devid ne ọguọmwadia mwẹ rri ọba nẹ, vbe ekpa ne I na sa ori ne ọ huanrẹn ye ọre uhunmwu.

²¹ Ẹtin mwẹ gha guẹe gha rrọ vbe ẹghẹ hia, ẹtin mwẹ gha ya ẹe wegbe.

²² Obọ eghian rẹn i ra gba ẹre ẹdẹ, emwa dan i ra sẹtin mu ẹẹn gbotọ.

²³ I gha rẹnkhẹn avbe eghian rẹn, I ghi vbe gbele iran ni khuiwu ẹre.

²⁴ I gha ho ẹmwẹ ọnrẹn I ghi vbe guobọ ẹre ẹsẹse. I gha ya ẹe gha khọnmiotọ vbe ẹghẹ hia.

²⁵ I gha rhie ba arriọba ẹre ke Meditẹrrenian kpao ya sẹ Ẹzẹ Yufretes.

²⁶ Rẹn gha tama mwẹ wẹẹ, ‘wẹ ọrọre erha mwẹ kevbe Osanobua mwẹ; wẹ ọrọre ne ọ degue mwẹ kevbe ọmiọnmwafan mwẹ.’

²⁷ I gha ya ẹe ru ovbi mwẹ nokpia ne ọdiọn, ne ọ kpọlọ sẹ vbe uwu avbe ọba hia.

²⁸ I gha ru nẹ, zẹ vbe ne I ve ẹre re vbe ẹghẹ hia ile ne I guẹe ta gha rrọ rhinrin ẹdẹ.

²⁹ Uniẹn ni rri ọba ẹre gha mudia gbain zẹ vbe iso ovbi urho ẹre ọ re ọ gha rri ọba rhinrin ẹdẹ.

³⁰ “Sokpan, a deghẹ ivbi uniẹn ẹnrẹn ma ya uhi mwẹ ru emwi, ighe iran ma vbe yin zẹ vbe uhi ilele mwẹ,

³¹ a deghẹ iran fi iyeke gbe ẹmwẹ ne I tae, ighe iran ma rhie iyi mwẹ mwẹ,

³² ẹghẹ nii, mẹ gha rri iran oya ye orukhọ iran, I gha gie iran rri oya ye abakuru iran.

³³ Sokpan, mẹ i ra dobọ ne I na ho ẹmwẹ Devid yi, ra ne I ghẹ ru vbe ne I ve ẹre re.

³⁴ Mẹ i ra so ile ne I guẹe ta gọ, ra ne I kie werriegbe vbe emwi ne I ve ẹre re.

³⁵ “I ya eni mwẹ ne ọ huanrẹn yan nẹ uhukpa ne ọ re ọghe ẹdẹ hia, mẹ i ra ta ohoghe ma e Devid ẹdẹ.

³⁶ Te a gha miẹn ivbi uniẹn ọnrẹn ẹdẹdẹmwẹdẹ. Mẹ gha vbe gha wan lẹga arriọba ẹre la ẹghẹ ne ovẹn gha vbe yunmwu la.

³⁷ Ọ gha mudia gbain zẹ vbe uki ne osẹe ẹmwata ne ọ rre iso nii.”

Eve Ba Ẹmwẹ Ne Obọ Na Ke Ukhunmwu Ne Ọba

³⁸ Sokpan, ohu ọba ne u hannọ zẹ mu uẹn, u ke he ẹe ye otọ, u kevbe fi iyeke gbe ẹe.

³⁹ U so ile ne u gu ọguọmwadia ruẹ ta gọ nẹ, u keghi fi ẹde ẹre fi otiku.

⁴⁰ U guọghọ ekẹn ne a gbe lẹga ẹvbo nii sotọ owa ọkhẹ ni rrọ, u rẹnkhẹn ọẹn ruan

⁴¹ ilavbodẹ hia gha do ẹre emwi hẹ, avbe ẹdogbo ẹre hia gha giẹ ọe.

⁴² U rhie akhọnmiotọ ne avbe eghian rẹn, u ke ya ẹko iran hia gha sẹ ọyẹnmwẹ.

⁴³ U ya emwi igbinna rẹn khian ne ẹ i mwẹ asa; u keghi gie obọ vba ẹre vbe okuo.

⁴⁴ U miẹn ẹre ọkpọ ọba ne ọ gue ẹe, u keghi dunmwu ẹkete ẹre sẹ otọ.

⁴⁵ U ya ẹe khian ọmaẹn idanmwidan; u keghi ya efa yọ ẹre ẹwu.

Erhunmwu Imiẹnfan

⁴⁶ E Nọyaẹnmwa, u gha rhie egbe lẹre rhinrin ẹdẹ ra? Inu ẹghẹ ọ re ohu ruẹ gha giẹn la zẹ vbe erhẹn?

⁴⁷ Yerre vbene ẹdẹ agbọn mwẹ kanmwa sẹ hẹ, yerre ighẹ te u yi ima hia ne a vbe sẹtin gha wu.

⁴⁸ De ọmwa ne ọ gha sẹtin gha rrọ ne ẹ i ra wu yi? Vbe ọmwa ra ya rhie egbe ẹre lẹ ne idin hẹ?

⁴⁹ Nọyaẹnmwa, avbe emwi ne u ya, yama ye ahoẹmwọmwa ruẹn ẹghẹ nii vbọ yi? Avbe emwi ne u ve Devid re hia ghi vbọ?

⁵⁰ Ghẹ mianmian vbene a rhovbiẹ mwẹ ne ọguọmwadia ruẹ hẹ vbene I ye egbe miẹn ihẹn ne iran ni ga ẹbọ tie hẹ.

⁵¹ Avbe eghian ruẹn, gha rhovbiẹ ọba ruẹ ne u hannọ zẹ Nọyaẹnmwa, iran ghigha rhovbiẹ ọe vbe ehe ne ọ rhirhi a la.

⁵² Wa rho Nọyaẹnmwa ẹdẹdẹmwẹdẹ! Isẹ! Isẹ!