Psalm 88 - Edo Bible (E Baibol Ẹdo) Version 1996

Utumwẹ Nẹ Ọ Nọ Iyobọ

¹ E Nọyaẹnmwa Osanobua ọmiọnmwafan mwẹ te I wa tu ne ebi ro, ọ ghi sẹ asọn, I keghi bu ruẹ gha dee.

² Họn erhunmwu mwẹ, rhie ehọ ye utumwẹ mwẹ ne I ya nọ iyobọ.

³ Ọlọghọmwa ni rhurhẹ yan mwẹ, bun sẹrriọ wẹ, te I ghi sikẹ uwu.

⁴ Mẹ yevbe emwa ọvbehe ni ghi ra wu hia, ẹtin mwẹ hia kpao nẹ.

⁵ A he mwẹ ye otọ ba avbe ikun orinmwi mẹ ye vbe emwa ne a gbele ni lovbiẹ ye uwu idin iran iran ne uwẹ mianmian ẹn fẹfẹẹfẹ emwa ni i ghi gie uwẹ ru iyobọ na.

⁶ U fi mwẹ fi uwu udinmwimwẹ idin, la uwu uvun ne ọ so ebiebi sẹẹ, kevbe ne ọ dinmwi sẹẹ.

⁷ Ohu ruẹ gha yẹnyẹn mwẹ ginna otọ, a rẹnkhẹn mwẹ uan ye ototọ ulẹmwẹ ẹzẹ ọre.

⁸ U gie avbe osẹ mwẹ he mwẹ ye otọ, u yamwẹ khian ne ọ zughu ẹko ne iran, a ke mwẹ ye ako, I i sẹtin lẹfua.

⁹ Te aro mwẹ ghi ghe vbirrivbirri rhunmwuda usẹ e Nọyaẹnmwa ẹdẹgbegbe ọ re I ya tu tie ruẹ. I ghi vbe viọ obọ da okhunmwu ghe ruẹ gha na erhunmwu.

¹⁰ Wẹ vbe ru emwi ọyunnuan ma orinmwi ra? Iran vbe kpaegbe ne iran gha rho ruẹ ra?

¹¹ A vbe ta ẹmwẹ iho ruẹ ne ẹ i beghe vbe idin ra? Ra ọghe aguobọmwa ruẹn vbe ihe ọfuan?

¹² A vbe bẹghe iwinna ọyunnuan ruẹn vbe uwu ebiebi nii ra? Ra umamwẹ ruẹn vbe otọ emwa ne a mianmian ẹn?

¹³ E Nọyaẹnmwa, mẹ kpe tie ruẹ nọ iyobọ, owiẹ owiẹ ọ re I ya na erhunmwu ghe ruẹ.

¹⁴ Vbe u a na he mwẹ hẹ yi Nọyaẹnmwa? Vbe u a na fi iyeke gbe mwẹ hẹ?

¹⁵ Ke ẹghẹ ọvbokhan mwẹ gha dee, I sẹ usẹ ne ọ sikẹ uwu, te I ghi kuagha, rhunmwuda ihẹ ọghe oya ne u rrio mwẹ re.

¹⁶ Ohu ruẹ ne ọ mwẹ oghae rẹnkhẹn mwẹ uan, igbinna ruẹn ne ọ gborrirri fuẹn mwẹ uan.

¹⁷ Iran lẹga mwẹ zẹ vbe orogho amẹ ne ebi ro iran hẹ rhu mwẹ ke igienenẹ rre.

¹⁸ U ru ẹe ne avbe osẹ ni sikẹ mwẹ sẹẹ he mwẹ yotọ ebiebi ọkpa ọrọre ogieva mwẹ.