Psalm 86 - Edo Bible (E Baibol Ẹdo) Version 1996

Erhunmwu Iyobọ

¹ Danmwehọ mwẹ Nọyaẹnmwa, ne u rhie ewanniẹn mẹ, rhunmwuda mẹ ma wegbe, ẹtin vbe fo mwẹ nẹ.

² Miẹn mwẹ fan vbobọ uwu rhunmwuda, mẹ rhie ekhọe mwẹ leluẹ, miẹn mwẹ fan, rhunmwuda, ọguọmwadia ruẹ mẹ khin, wẹ ọre I mu ẹtin mwẹ yan.

³ Wẹ ọrọre Osanobua mwẹ, rhunmwuda ọnii, tohan mwẹ, ẹdẹ biiri ọ re I ya na erhunmwu ghe ruẹ.

⁴ Ya ẹko ọguọmwadia ruẹ rhiẹnrhiẹn Nọyaẹnmwa rhunmwuda, erhunmwu hin bu ruẹ dee.

⁵ Wẹ maa ne ima, u kevbe ya orukhọ bọ, u vuọn ne aho ne ẹ i beghe ne iran ni na erhunmwu ghe ruẹ.

⁶ Nọyaẹnmwa, danmwehọ erhunmwu mwa họn utumwẹ ne I tu ya nọ iyobọ.

⁷ I kpe tie ruẹ vbe ẹghẹ ibaro, rhunmwuda, wẹ họn erhunmwu mwẹ.

⁸ A i miẹn osa ne ọ yevbe uwẹ Nọyaẹnmwa, okpa ne ọ he ru emwi ne uwẹ ru i rrọ.

⁹ Uhunmwu ẹvbo ne uwẹ he yi hia, gha rre do ya uhunmwu rhanmwẹ otọ nuẹn iran gha rho ukpọlọmwẹ ruẹn.

¹⁰ Wẹ kpolo, u keghi vbe ru emwi ọyunnuan, wẹ okpa kẹkan ọrọre Osanobua.

¹¹ Nọyaẹnmwa, ma mwẹ emwi ne u ho ne I ru I gha họn ẹmwẹ ne uẹn kekhọekekhọe, ma mwẹ re ne I gha ga a, vbe ne I na wa mu aro yọ ẹsẹse.

¹² I gha ya ekhọe mwẹ hia rho ruẹ Nọyaẹnmwa Osanobua mwẹ I gha na iyẹn ukpọlọmwẹ ruẹn ẹdẹdẹmwẹdẹ.

¹³ U miẹn vbe ahoẹmwọmwa ruẹn ne ẹ i beghe kpọlọ ghe mwẹ hẹ! U yuo mwẹ hin idin tobọ ẹre rre.

¹⁴ Iran ni tọn egbe mu, mu aro da mwẹ Osanobua, otu emwa dan okpa ho ne ọ gbe mwẹ uan avbe emwa ne ẹ i zẹ ye uwẹ re hiehie.

¹⁵ Sokpan Osanobua ne ọ mwẹ itohan, kevbe ne ọ ho ẹmwẹ ọmwa, ọ re uwẹ khin Nọyaẹnmwa, ne ọ ziengbe vbe ẹghẹ hia ne ọ mwẹ itohan kevbe ne ọ guobọmwa.

¹⁶ Gbe bu mwẹ rre ne u tohan mwẹ, rhie orhiọn yọmwẹ iwu ne u miẹn mwẹ fan, rhunmwuda, mẹ ga uwẹ zẹ vbene iye mwẹ vbe ru.

¹⁷ Ya emwi zẹ ama ọghe umamwẹ ruẹn ma mwẹ, Nọyaẹnmwa, ekhue gha mu iran ni khuiwu mwẹ vbe iran a miẹn wẹ, u rhie egbe rọkhọmwẹ kevbe iyobọ mẹ.