Psalm 84 - Edo Bible (E Baibol Ẹdo) Version 1996

A Ho Ne A Gha Rre Owa Osanobua

¹ A miẹn vbe Ọgua Osa ruẹ yẹ mwẹ hẹ Osa ne Oghodua!

² Ghe vbene ọ khọn mwẹ hẹ ne I gha rre evba, Ọ khọn mwẹ ẹsẹse, ne I gha rre Ọgua Osa e Nọyaẹnmwa. Ekhọe mwẹ hia ọ re I ya so ihuan oghọghọ ghe Osanobua ne ọ rrọọ.

³ Avbe uhaiso bọlọ oko, ivbialumẹ vbe mwẹ owa iran, iran viọ ivbi iran negiẹrẹ, ye ọkpẹn Ogiukpo ruẹ, Nọyaẹnmwa ne Oghodua ọba mwẹ kevbe Osanobua mwẹ.

⁴ Ọmakin iran ni rre uwu Ọgua Osa ruẹ, ni vbe so ihuan urhomwẹ ghe ruẹ, vbe ẹghẹ hia.

⁵ Ọmakin iran ne ẹtin ẹnrẹn ke ehe ne uwẹ ye rre, ne ọ wa vbe bọbọ ẹre egbe, ne ọ mu okhian gha rriẹ Oke Zaiọn.

⁶ Iran gha la iya e Baka ne ọ kae gberra, ọ ghi khian ẹzẹ ne ọ lẹ amẹ ne ọ ka rhọ, ghi ya ẹe vuọn ne ivbiọghọdọ.

⁷ Vbene iran ya nana sikẹ odaro, erriọ orhiọn ya la iran iwu. Iran gha miẹn Osanobua, ne ọ yan avbe osa hia, vbe uhunmwu e Zaiọn.

⁸ Họn erhunmwu mwẹ Nọyaẹnmwa Osanobua ne Udazi. Danmwehọ, Osanobua e Jekọb.

⁹ Osanobua, fiangbe ọba mwa Ọba ne uwẹ hannọ zẹ.

¹⁰ Ẹdẹ okpa ne a yae vbe Ọgua Osa ruẹ maa sẹẹ arriaisẹn ne a yae vbe ehe ọvbehe, I mudia ye onurho owa Osanobua mwẹ, ọ re ọ maa sẹẹ ne I gha rre uwu owa emwa dan.

¹¹ E Nọyaẹnmwa ọrọre ne ọ degue mwa, kevbe ọba uyi, ne ọ ya itohan kevbe ọghọ fiangbe mwa. Ẹ i gban emwi ne ọ maa rhọkpa, hin obọ iran ni ru vbene ọ kere rre.

¹² Osa ne Oghodua, afiangbe ọghe iran ni mu ẹtin yan ruẹn.