Psalm 83 - Edo Bible (E Baibol Ẹdo) Version 1996

Erhunmwu Wẹ Ne A Khọn Eghian Izrẹl Muotọ

¹ Osanobua, ghẹ hunwan, ghẹ mudia ye ihọkpa, ghẹ ghe ẹmwẹ.

² Ghe avbe eghian ruẹn si otighi, iran ni khuiwu ruẹ vbe sọtẹ.

³ Iran gha si uma ẹkhokho ga emwa ruẹn iran gha khuan khẹ emwa ne uwẹ mudia na.

⁴ Iran khare wẹẹ, “Wa larre, wa gie ima guọghọ uhunmwu ẹvbo iran an, ne a wa mianmian Izrẹl ẹdẹdẹmwẹdẹ.”

⁵ Iro ne iran zẹe gu egbe ro nẹ, iran ku obọ gbe mu aro da ruẹ.

⁶ Ivbi Idọm kevbe Ismẹl, ivbi e Moab kevbe Hagrit,

⁷ ivbi Gẹbal, Amọn kevbe Amalẹk, kevbe Filistia kevbe Taia.

⁸ Asiria vbe ya egbe ba iran, zẹvbe akuobọgbe ọghe Amọn e Moab kevbe ivbi e Lọt.

⁹ Ru iran zẹ vbene u ru ivbi e Midian, kevbe Siseria kevbe Jabin vbe Ẹzẹ Kisọn.

¹⁰ U khọn iran muotọ vbe Ẹndọ, ikun iran keghi kẹkẹ ye otọ.

¹¹ Ru avbe ọkaolotu iran, zẹ vbene u ru ghe Orẹb kevbe Zib, khọn iran ni kha yan iran, zẹ vbene u ru e Zeba kevbe Zalmuna.

¹² Iran ni khare wẹẹ, “Ma gha mu otọ ne ọ re ọghe Osanobua ya khian ọghe ima.”

¹³ Zagha iran kua zẹ vbe ẹbe nọkakae ne ẹhoho hoho kua.

¹⁴ Zẹ vbene erhẹn giẹn vbe uwu ẹgbo. Zẹ vbene aranmwẹ erhẹn giẹn uhunmwu oke.

¹⁵ Ya okpẹhoho ruẹ khulo iran kua ne u vbe ya ẹhoho ọbanabe ruẹ runran iran.

¹⁶ Ya ekhue gue iran aro Nọyaẹnmwa, ne u gie iran miẹnkue wẹ, u mwẹ ẹtin.

¹⁷ Te obọ gha gba iran, ne iran vbe runran ẹdẹdẹmwẹdẹ. Uwu efa ẹkẹkhẹrhẹ, ọ re iran gha wulo yi.

¹⁸ Te iran gha rẹn wẹ wẹ ọkpa ọrọre Nọyaẹnmwa, ne ọ khaemwisẹ yan emwi hia, ni rre otọ agbọn.