Psalm 81 - Edo Bible (E Baibol Ẹdo) Version 1996

Ihuan Emwiukpo

¹ Wa we uwemwẹ oghọghọ ne Nọyaẹnmwa ọmwa ne ọ gbinna ne ima, wa so ihuan urhomwẹ ghe Osanobua Jekọb.

² Wa sobọ ye emwi ihuan, ne uwa kpe avbe ema nii, wa ye akpata kevbe ẹrere so ihuan ne ọ rhiẹnrhiẹn.

³ Wa kpe okpe ye emwiukpo nii, vbe uki a da hin kevbe uki a ko urro.

⁴ Uhi ẹre ọna khin vbe Izrẹl, iyi ne Osanobua e Jekọb yi.

⁵ Rẹn ọ re ọ rhie ẹre ne ivbi Izrẹl, vbe ẹghẹ ne ọ na gu otọ Igipt gbinna. I họn vbe urhu okpa ne a ma rẹn khare wẹẹ,

⁶ “I mu ihẹ hin uwa uhunmwu rre, I sie uwa ihẹ ọghe ibiriki.

⁷ Ẹghẹ ne uwa na gha rre uwu ọlọghọmwa, wa kpe tie mwẹ, I keghi miẹn uwa fan, ehe ne I lẹre yi vbe uwu okpẹhoho, ọ re I ke rhie ewanniẹn ne uwa, I keghi danmwẹ uwa ghe vbe ẹzẹ Mẹriba.

⁸ Wa ne emwa, wa danmwehọ ibude mwẹ, vbe ọ rrọ nian wẹ wa gha họn ẹmwẹ mẹ ivbi Izrẹl!

⁹ Wa ghẹ danmwẹ ẹbọ ọvbehe ga ẹdẹ.

¹⁰ Mẹ ọrọre Nọyaẹnmwa ne Osanobua uwa, ne ọ viọ uwa ke otọe Igipt ladian, wa rhan unu uwa, I gha koko uwa.

¹¹ “Sokpan avbe emwa mwẹ I danmwehọ mwẹ, Izrẹl ma họn ẹmwẹ mẹ.

¹² Rhunmwuda ọnii, I keghi sẹ iran rae, ne iran la odẹ iyin ehọ iran, ne iran ya gha ru emwi ne ọ khọn iran.

¹³ Vbọrrọ akpawẹ emwa mwẹ gha danmwehọ mwẹ; vbọrrọ akpawẹ iran gha họn ẹmwẹ mẹ!

¹⁴ I gha zẹgiẹgiẹ deyan eghian iran, I ghi vbe khọn eghian iran hia muotọ.

¹⁵ Ohan gha mu iran ni khuiwu mwẹ, iran gha do gha mu uhunmwu gbotọ mẹ. Irriakhi iran gha a rrọọ rhinrin ẹdẹ.

¹⁶ Sokpan, I gha ya ọka ne ọ mose sẹẹ koko uwa I gha ya owọn oha sẹ uwa ọkẹn.”