Psalm 80 - Edo Bible (E Baibol Ẹdo) Version 1996

Erhunmwu Wẹ Ne A Dọlọ Rhie Ẹvbo Ye Ihe

¹ Danmwehọ ima ọmwa Ne ọ huanrẹn Izrẹl họn ọghomwa, we ne ọkaolotu emwa ruẹn wẹ ne ọ tota ye ẹkete ruẹ vbe odukhunmwu avbe aranmwẹ ni zẹ ifuẹn.

² Rhie egbe ruẹ ma ẹwae Ifreim, e Bẹnjamin kevbe Manasẹ. Rhie ẹtin ruẹn ma mwa, larre do miẹn mwa fan.

³ Viọ ima werriegbe gha dee, Osanobua, rhie itohan ruẹn ma mwa a gha vbe miẹn ima fan.

⁴ Vbe ọ gha ye kpee sẹ hẹ yi, Nọyaẹnmwa Osanobua Ne Oghodua? U gha mu ohu erhunmwu avbe emwa ruẹn ra?

⁵ U rhi akhiẹ ne ima re nẹ, ukpu ne ọ kpọlọ ọghe ameve ne ima wọn.

⁶ U vbe gie avbe uhunmwu ẹvbo ni lẹga mwa gha khọn sinmwi otọe mwa, avbe eghian mwa rhovbiẹ mwa.

⁷ Viọ ima werriegbe gha dee Osanobua Ne Oghodua rhie itohan ruẹn ma mwa a gha miẹn ima fan.

⁸ U rhie azara ima okpa ke Igipt rre, u khulo uhunmwu ẹvbo nekpa ladian, u keghi gbọ ẹre ye otọe iran.

⁹ U gbẹn irunmwu hin ehe ne ọ gha na wan rre nẹ, inian rẹn kakabọ la uwu otọ, ọ keghi wa obọ gba otọe nii hia.

¹⁰ Ọ ya irhu ẹre gue avbe oke avbe abọ ẹre keghi gbe irhu gue avbe erhan isida nekhua.

¹¹ Ọ niẹn abọ ẹre ya sẹ Okun Meditẹrrenian, kevbe ya sẹ Ẹzẹ Yufretes.

¹² Vbọzẹ ne u na guọghọ ogba ne ọ lẹga ẹre kua yi? Ọmwaikọmwa ne ọ ghi gberra sẹtin do ọmọ rẹn kọlọ nian.

¹³ Avbe aranmwẹ oha ya owẹ rri ẹe ginna otọ, avbe aranmwẹ oha vbe rri oẹ.

¹⁴ Werriegbe bu ima rre Osanobua Ne Oghodua ke ẹrinmwi gbearoghe otọ ghe mwa, larre, do miẹn emwa ruẹn fan.

¹⁵ Do miẹn azara na ne uwẹ gbọre fan, ovbi azara na ne uwẹ gie ẹe wa wan, kevbe ne ọ wegbe sẹ vberriọ.

¹⁶ Avbe eghian mwa mu erhẹn yọ, iran kevbe tọn ẹn gbotọ, ya ohu ghe iran, ne u fuẹn iran an.

¹⁷ Rhie emwa ruẹn ne u hannọ zẹ lẹre, ne u vbe degue iran, uhunmwu ẹvbo ne uwẹ ya wegbe ẹsẹse.

¹⁸ Ma i ghi dọlegbe fi iyeke gbe uwẹ ẹdẹ, gie ima gha rre agbọn, ma gha vbe gha rho ruẹ.

¹⁹ Nọyaẹnmwa Osanobua Ne Oghodua viọ ima werriegbe rre rhie itohan ruẹn ma mwa a gha vbe miẹn mwa fan.