Psalm 79 - Edo Bible (E Baibol Ẹdo) Version 1996

Erhunmwu Imiẹnfan Otọ Ẹvbo Hia

¹ Osanobua. avbe nigẹbọ mu okuo la otọe ruẹ, iran mu awua la Ọgua Osa ruẹ nọhuanrẹn iran keghi rẹnkhẹn Jerusalẹm sẹ otọ.

² Iran sẹ ikun avbe emwa ruẹn rae ne avbe ugu, kevbe ikun eguọmwadia ruẹ ne avbe aranmwẹ oha gha re.

³ Iran tue esagiẹn emwa ruẹn ye otọ zẹ vbe amẹ. Esagiẹn gha lẹ zẹ vbe amẹ, la ore Jerusalẹm hia. A ma ghi vbe sẹ orhiọnkpa rae ne ọ gha re orinmwi.

⁴ Avbe ẹvbo ni lẹga mwa gha tie ihẹn ne ima. Iran gha giẹ ima iran gha ya ima gbe ogiẹ.

⁵ Nọyaẹnmwa, u gha wa mu ohu ima rhinrin ẹdẹdẹmwẹdẹ ra? Ohu ruẹ gha wa gha giẹn khian zẹ vbe erhẹn ra?

⁶ Werriẹ aro ohu ruẹ da avbe uhunmwu ẹvbo ni i ga a, ghe avbe emwa ni i na erhunmwu ghe ruẹ.

⁷ Rhunmwuda, iran gbele emwa ruẹn, iran mu ẹvbo ruẹ rhia a.

⁸ Ghẹ rri ima oya ye orukhọ avbe erha mwa odede, tohan mwa, egbe wọ ima nẹ.

⁹ Yima obọ Osanobua ne u miẹn ima fan, fannọ ima yotọ ne u vbe ya orukhọ mwa bọ mwa rhunmwuda uyi ruẹ.

¹⁰ Vbọzẹ ne avbe uhunmwu ẹvbo gha na gha nọ ima wẹẹ, “Osanobua uwa vbọ?” Gie ima bẹghe ẹre vbe u rri avbe uhunmwu ẹvbo nii oya, rhunmwuda ne iran na gbe esagiẹn emwa ruẹn ye otọ.

¹¹ Họn utumwẹ obalọ ọghe iran ni rre eghan, ne u vbe ya ẹtin ruẹn nọkhua fannọ iran ne a bu ohiẹn uwu gbe kua.

¹² Nọyaẹnmwa, ha ẹre werriegbe ne avbe uhunmwu ẹvbo nekpa igba ihinrọn rhunmwuda unu ne iran filo guẹ.

¹³ Ẹghẹ nii, ma ne emwa ruẹn ne ohuan oghẹn ruẹn gha kpọnmwẹ ọn ẹdẹdẹmwẹdẹ ma ghi vbe gha rho ruẹ la ẹdẹ ni dee hia.