Psalm 78 - Edo Bible (E Baibol Ẹdo) Version 1996

Osanobua Kevbe Emwa Rẹn

¹ Wa ne emwa mwẹ, wa danmwehọ emwi ne I ma uwa ẹre, ne uwa vbe gbe ehọ kotọ vbe I guan.

² I gha ya ẹmwẹ ẹwaẹn rhan otọ emwiọkpaodin ni gberra nẹ.

³ Emwi ne ima ka họn nẹ, ne a vbe rẹn avbe emwi ne avbe erha mwa tama mwa.

⁴ Ma i ra viọ iran lẹre ne avbe ivbi mwa ma gha tae ma orre ne ọ ghi lele ẹe ekpa ọghe ẹtin e Nọyaẹnmwa kevbe avbe iwinna nekhua ne ọ winna ẹn kevba avbe emwi ọyunnuan ne ọ he ru.

⁵ Ọ rhie uhi ne ivbi Izrẹl kevbe iyi ne ivbi uniẹn Jekọb ọ ma avbe erha mwa odede ẹre. Wẹ ne iran ma avbe ivbi iran uhi irẹn.

⁶ Ne orre ne ọ ghi lele ẹe miẹn ehe na ruẹ iran, ne iran vbe ta ẹe ma avbe ivbi iran. Wẹ ne iran ma avbe ivbi iran uhi irẹn.

⁷ Vbe odẹ vbenian, iran gha mu ẹtin yan e Nọyaẹnmwa iran, i ra vbe mianmian iwinna ne ọ winnaẹn, iran ghi gha ya uhi ẹre, ru emwi vbe ẹghẹ hia.

⁸ Iran i ra yevbe avbe erha iran odede emwa ni sọtẹ kevbe ni zẹ utun vbe ehọ ni ma mu ẹtin yan Osanobua ẹse, kevbe ni ma vbe guobọ ẹre.

⁹ Ivbi Ifreim, ni viọ uhanbọ kevbe ifẹnmwẹ keghi lẹ kua vbe ẹdẹ ne a khọn okuo.

¹⁰ Iran ma mu ile ne iran gu Osa ta sẹ, iran keghi he, ne iran ya uhi ẹre ru emwi.

¹¹ Iran mianmian emwi ne ọ ru iwinna ọyunnuan ne iran miẹn vbe ọ winnaẹn.

¹² Vbe odaro evbibiẹ iran, ọ re Osanobua na winna iwinna ọyunnuan, vbe otọe ne ọ rriẹe ọghe Zoan vbe otọe Igipt.

¹³ Ọ wa okun ye ihe eva, ọ na viọ iran la ẹe gberra, ọ keghi ru ẹe ne amẹ mudia, zẹvbe egbekẹn.

¹⁴ Vbe ẹghẹ avan, ọ keghi ya okuku su iran ọ keghi ya orre erhẹn su iran vbe asọn hia.

¹⁵ Ọ va okuta vbe ato ọ na rhie amẹ gie iran ke odin rre.

¹⁶ Ọ ru ẹe ne amẹ ke uwu okuta lẹ ladian ọ keghi gie amẹ ni gha lẹẹ zẹ vbe ẹzẹ.

¹⁷ Sokpan, iran keghi ye gha ru orukhọ ghe Osanobua iran keghi sọtẹ ghe Ne ọ yo sẹẹ Ehia vbe ato.

¹⁸ Iran na wa yan ru ẹe ne iran danmwẹ Osanobua ghe, vbe ne iran na gha nọ evbare ne ọ khọn iran.

¹⁹ Iran keghi ya ukpe gha sakan Osanobua, iran wẹẹ, “Osanobua gha sẹtin rhie evbare rre vbe ato ra?

²⁰ Ẹmwata nọ wẹ, ọ fi okuta emwi amẹ kegha lẹ ogbigbi ladian. Sokpan, ọ gha vbe sẹtin rhie evbare ne ima ra ne ọ vbe viọ emiowo gie emwa rẹn?”

²¹ Rhunmwuda ọnii, ohu keghi mu e Nọyaẹnmwa, vbe ọ họn ẹmwẹ ne iran ta, ọ keghi ya erhẹn gu emwa irẹn gbinna, ohu iran keghi kakabọ mu ẹẹn.

²² Rhunmwuda, iran ma mu ẹtin yan rẹn iran ma vbe yayi ighẹ ọ gha miẹn iran fan.

²³ Sokpan, rẹn keghi gu iso guan vbe odukhunmwu, ọ na wẹ ne urho ẹre kie rua,

²⁴ ọ viọ ọka ke ẹrinmwi gie iran vbe ne ọ na viọ emana gie iran re.

²⁵ Rhunmwuda ọnii, iran keghi rri evbare ẹrinmwi, Osanobua keghi viọ emwi ne iran ho hia ne iran.

²⁶ Ọ keghi vbe ru ẹe ne ẹhoho odẹ ahọ hoho ọ keghi ya ẹtin ẹnrẹn gua ẹhoho odẹ ekẹn kpao.

²⁷ Ọ keghi viọ ahianmwẹ gie emwa rẹn ubunmwẹ ọnrẹn keghi yevbe ikpekhae ni rre ikpogho okun.

²⁸ Iran keghi dele ye adesẹneva agọ nii kevbe lẹga owa ukpọn iran.

²⁹ Rhunmwuda ọnii, avbe emwa nii keghi re ne ẹko vuọn. Osanobua keghi viọ emwi ne iran ho ne iran.

³⁰ Sokpan, ẹko emwi ne iran rriarria yi ma he ye vuọn iran iran keghi ye gha re.

³¹ Ẹghẹ nii, ohu iran mu Osanobua, ọ keghi gbele emwa iran ni mwẹ ẹtin sẹẹ, avbe igbama ni maa sẹẹ vbe Izrẹl.

³² Vbene a ye do ena hia sẹ, emwa nii kevbe ye gha ru orukhọ khian, vbene ọ ye winna iwinna ọyunnuan sẹ iran ma mu ẹtin yan rẹn.

³³ Rhunmwuda ọnii, ọ keghi fian iran ẹdagbọn uan, zẹ vbe uhiọnrọnmwẹ, kevbe arrọ ọghe iran vbe uwu ekpainkpain.

³⁴ Ọ gha gbele eso vbe uwu iran, nekpa ghi zẹgiẹgiẹ lẹ bu ẹre rre, iran ghi ro iro fi uyinmwẹ werriẹ, iran ghi gha na erhunmwu akekhọerre ghe ẹre.

³⁵ Iran yerre wẹ, Osanobua ọ re ọ degue iran, kevbe wẹ, Osanobua ne Udazi rre do ye iran obọ.

³⁶ Sokpan, ohoghe ọ re ẹmwẹ iran hia khin, ẹmwẹ ne iran ta okpa ne ọ sẹ otọ ẹko i rrọ.

³⁷ Iran ma guobọ ọre, iran ma ya ile ne iran gu ẹe ta ru emwi.

³⁸ Sokpan, Osanobua tohan emwa rẹn ọ ya orukhọ iran bọ iran, ọ ma fuẹn iran an. Ẹghẹ nibun ọ re ọ ya mu ohu ne ọ te mu ẹẹn yotọ ọ ke vbe werriegbe vbe ohu ẹre nọkhua.

³⁹ Ọ yerre wẹ emwa ni sẹtin wulo iran khin, zẹ vbe ẹhoho ne ọ hoho gberra, a ghi ho ẹre bẹkun.

⁴⁰ Kugba kẹghẹrẹ ọ re iran ya gha sọtẹ ghe ẹre vbe uwu ato, kugba kẹghẹrẹ ọ re iran ya gha rhia ẹre ẹko rua.

⁴¹ Iran kegha danmwẹ Osanobua ghe, iran keghi zẹ obalọ ye Ọmwa Ne ọ huanrẹn Izrẹl egbe.

⁴² Iran mianmian ẹtin ẹnrẹn nọkhua, kevbe ẹdẹ ne ọ miẹn iran fan, vbe obọ eghian iran.

⁴³ Ne ọ na winna iwinna ni kọnkọn kevbe ọghe ọyunnuan, vbe otọe ne ọ rriẹe ọghe Zoan, vbe otọe Igipt.

⁴⁴ Ọ fi ẹzẹ werriẹ khian esagiẹn, avbe ivbi Igipt ma ghi miẹn amẹ wọn.

⁴⁵ Ọ gie ikian bu iran gha khian, iran keghi ya yan iran, kevbe ẹkirẹ ne ọ mu otọe iran rhia.

⁴⁶ Ọ gie irhiso ya rri iran emwiokọ, ne ọ vbe mu iran ugbo rhia.

⁴⁷ Ọ ya esia mu iran ugbo azara rhia, amẹ ni wẹwẹ ne ọ mu erhan ohọ rhia.

⁴⁸ Ọ ya esia gbele iran ẹmila a, avan nukhunmwu keghi gbele ohuan iran an.

⁴⁹ Ọ si akhiẹ nọkhua ye iran egbe vbekpa ne ọ na hihiẹ ohu kevbe okuosu ẹre yan iran, ne ọ wa bu iran rre zẹvbe emwa, ne uwu gie ẹre uhunmwu rre.

⁵⁰ Ọ ma vbe gbe ibiẹ rriẹ vbe ohu nii, ra ne ọ vbe fi yi vbe uwu iran, sokpan, ọ keghi ya egboghogbogho lọkọ iran an.

⁵¹ Ọ gbele avbe emọdiọn, vbe ẹgbẹe ni rre Igipt hia.

⁵² Ẹkpo nii, ọ keghi su avbe emwa rẹn ladian zẹvbe ọsuohuan ọ keghi su iran la uwu ato gberra.

⁵³ Ọ su iran vbe ne ai na mwẹ ẹbe, ohan ma vbe mu iran, sokpan, okun keghi hihiẹ rre ọ na lẹ rhu avbe eghian iran muotọ.

⁵⁴ Ọ viọ iran gha die otọ ẹre ne ọ huanrẹn, gha die oke ne irẹn tobọ ẹre khọn muotọ.

⁵⁵ Ọ khulo iran ni yin ẹnrẹn ladian, vbe avbe emwa irẹn dee, ọ ghae otọe iran ne iran ne ẹwae Izrẹl ọ na vbe munọ owa iran ne emwa irẹn.

⁵⁶ Sokpan, iran sọtẹ Osanobua ne Udazi, iran kegha danmwẹ ọẹn ghe, iran ma ya uhi ẹre ru emwi.

⁵⁷ Sokpan iran sẹ ẹmwẹ ọnrẹn, iran ma guobọ ẹre, vbene avbe erha iran wa vbe ru, iran khian ne ẹ i gia mu ẹtin yan zẹvbe uhanbọ ne ọ gọe.

⁵⁸ Iran ya ehe ne iran na ga ẹbọ ya ohu muẹn iran keghi vbe ya amazẹ iran rhia ẹre ẹko rua.

⁵⁹ Ohu mu Osanobua vbe ọ miẹn emwi na ọ na rhunmwuda ọnii he emwa rẹn fẹẹrẹ.

⁶⁰ Ọ he owa ukpọn ẹnrẹn ne ọ rre Siailo ye otọ, owa ne irẹn te gha ye vbe uwu ẹbu ima.

⁶¹ Ọ gie avbe eghian mwa khọn mu Ẹkpẹti Ile ne ọ re ama ọghe ẹtin kevbe uyi ẹre.

⁶² Ohu emwa rẹn mu ẹẹn, ọ na gie avbe eghian iran gbele iran an.

⁶³ A gbele avbe igbama vbe okuo avbe uvbi ma ghi miẹn ọdọ rọnmwẹ.

⁶⁴ Avbe ohẹn wulo uwu dan, a ma vbe gie avbe amwẹ iran khiẹ iran.

⁶⁵ Vbe okiekie e Nọyaẹnmwa keghi rhiọrre vbe ne a miẹn wẹ te ọ te vbiẹ, ọ keghi yevbe okpia ne ọ wegbe ne ọ ya ayọn fian ọghae ye uhunmwu.

⁶⁶ Ọ keghi khulo avbe eghian rẹn werriegbe vbe ọ khọn iran muotọ nẹ ọ keghi vbe zẹ efa etẹbitẹ ye iran egbe.

⁶⁷ Sokpan, ọ he ivbi uniẹn Josẹf yotọ ọ ma vbe hannọ ẹwae Ifreim zẹ.

⁶⁸ Sokpan, ọ keghi zẹẹ ẹwae e Juda kevbe Oke Zaiọn ne ọ ho ẹmwẹ ọnrẹn ẹsẹse.

⁶⁹ Evba nii i ọ re ọ bọ Ọgua Osa ẹre yi zẹ vbe owa ẹre ne ọ rre ẹrinmwi. Ọ ru ẹe ne ọ deziẹn zẹ vbe agbọn na tobọ ẹre, ne ọ de ziẹn ẹdẹdẹmwẹdẹ.

⁷⁰ Ọ zẹ Devid ne ọguọmwadia ẹre, ọ rhie ẹre ke oha ne aranmwẹ na rria ladian.

⁷¹ Ehe ne ọ na su avbe ohuan rẹn, ọ ke ya ẹe rri ọba Izrẹl. Ọmwa ne ọ su ohuan emwa Osanobua.

⁷² E Devid kegha gbearoghe iran. Ọ mu aro yọ vbe ne ọ na mianmian enegbe ẹre, ọ na ya iguemwi gha su iran khian.