Psalm 77 - Edo Bible (E Baibol Ẹdo) Version 1996

Ifuẹko Vbe Ẹghẹ Akhiẹ

¹ I kakabọ datu tie Osanobua I kakabọ datu, ọ keghi họn urhu mwẹ.

² Vbe ẹghẹ ọlọghọmwa I na erhunmwu ghe Nọyaẹnmwa, vbe asọn biiri I keghi viọ obọ mwẹ da odukhunmwu gha na erhunmwu. Sokpan, egbe ma ye rọkhọ mwẹ.

³ I ghẹ ghi mu ẹmwẹ Osanobua roro, I ghi gbe igunma, I ghẹ ghi rria ẹre vbe ekhọe mwẹ, ẹtin ghi fo mwẹ.

⁴ Vbe asọn biiri ọ ma gunmwẹ vbiẹ ekhọe mwẹ rhia sẹrriọ wẹ I ma sẹtin guan.

⁵ I mu ẹmwẹ ẹghẹ ne ọ gberra ro, I ye avbe ukpo ni gberra ni kpee fua rre.

⁶ I ye asọn ni ro iro ne ọ dinmwi, ugbẹn vbe I rria ẹre vbe ekhọe mwẹ I keghi nọ egbe mwẹ wẹẹ,

⁷ “Nọyaẹnmwa gha wa he ima fẹẹrẹ ra? Ẹko ẹre i ghi ra rhiẹnrhiẹn ghe ima ẹdẹ ra?

⁸ Te ọ ghi dobọ ne ọ na ho ẹmwẹ mwa yi ra? Te a ghi so eyan ne ọ te yan gọ ra?

⁹ Te Osanobua ghi mianmian ne ọ gha tohan ọmwa ra? Te ohu ghi rhie ihe itohan rẹn ra?”

¹⁰ Vbe iyeke ọnii I keghi kha wẹẹ, “Ne ọ ghi balọ mwẹ sẹ vbọ ọ re ọna khin wẹẹ, ‘Osanobua i ghi mwẹ ẹtin ọvbehe.’ ”

¹¹ Te I gha ye iwinna nekhua ne u winna ẹn rre Nọyaẹnmwa I gha ye avbe iwinna ọyunnuan ne u winnaẹn ẹkpo nẹdẹ rre.

¹² I gha mu emwi hia ne u he ru ro I gha rria avbe iwinna nekhua ruẹ.

¹³ Emwi hia ne u ru, ni huanrẹn nọ Osanobua, Osanobua ne ọ kpọlọ vba ruẹ i rrọọ.

¹⁴ Wẹ ọrọre Osanobua ne ọ winna iwinna ọyunnuan u rhie ẹtin ruẹn maa vbe uwu ẹbu agbọn ẹvbo.

¹⁵ Ẹtin ruẹn ọ re u ya miẹn emwa ruẹn fan ivbi uniẹn Jekọb kevbe Josẹf.

¹⁶ Ugbẹn vbe amẹ bẹghe Osanobua, ohan mu iran, orinmwi amẹ okun ke gha mian.

¹⁷ Ikpakpiso rhọ amẹ yotọ; avan nukhunmwu khuarha ke iso rre, ayan keghi yan viọ asan gba ehe hia.

¹⁸ Ukhuarhamwẹ avan nukhunmwu ruẹn werriẹ ladian, asan ọghe ayan; keghi viọ asan uwanmwẹ ọnrẹn yan otọ agbọn; otọ agbọn mu rueghe ọ ke gha mian.

¹⁹ Wẹ ya owẹ khian la uhuemwẹ amẹ; u fian okun ne ọ dinmwi rra; sokpan a ma miẹn ama owẹ ruẹ vbe otọ.

²⁰ U su emwa ruẹn gha khian zẹvbe ọsuohuan u keghi mu iwinna iran yan Mosis kevbe Errọn obọ.