Psalm 76 - Edo Bible (E Baibol Ẹdo) Version 1996

Osanobua Ne Ọ Khọnmiotọ

¹ A rẹn Osanobua vbe Juda a vbe ya ọghọ ne eni ẹnrẹn vbe Izrẹl.

² Ọ mwẹ owa ẹre vbe Jerusalẹm Oke Zaiọn ọrọre ehe ne ọ dia.

³ Evba ọ re ọ na bunnọ ifẹnmwẹ eghian, kevbe asa kevbe umozo iran, deba emwi igbinna iran hia.

⁴ A miẹn vbe uyi ruẹ kpọlọ hẹ Osanobua a miẹn ẹtin nọkhua ne u ya tuorre ke uhunmwu oke dee, vbe ehe ne u na ya khọn avbe eghian ruẹn muotọ.

⁵ Avbe ivbiyokuo iran ni mwẹ ẹtin hia a bannọ emwi ne iran mwẹ hia kua, banbanna nian, iran gha vbiẹ ovbe uwu; iwegbe kevbe iguemwi iran hia keghi khian ekẹkan.

⁶ Ẹghẹ ne u na ya obọ sekhae ne iran Osanobua Jekọb, avbe ẹsin kevbe iran ni hin iran keghi dele, iran na wulo.

⁷ Sokpan, emwa hia ọ re ọ mu ohan ruẹn Nọyaẹnmwa, ohu gha mu uẹn omwa okpa i rrọ ne ọ gha sẹtin mudia vbe odaro ruẹ.

⁸ Ẹrinmwi ọ re uwẹ ke rhie ibuohiẹn ruẹn maa. Ohan keghi mu agbọn ọ na hunwan zẹẹ.

⁹ Ugbẹn vbe uwẹ gua kpaegbe ne u bu ohiẹn ne u miẹn iran ne a zẹ kpokpo vbe agbọn fan.

¹⁰ Te ohu ne emwa nagbọn mu, dọlegbe rhie urhomwẹ ne uẹn sayọ, iran ni miẹn uhunmwu vbe okuo nii gha ru emwi ukpo ruẹ.

¹¹ Ha emwi ne u ve, ne Nọyaẹnmwa Osanobua ruẹ; wa ye imuohan gie ẹe wa ne agbọn ẹvbo ni sikẹ edinran.

¹² Osanobua ru ẹe ne emwa gha mu ohan irẹn ọ munọ iran ni tọn egbe mu rriotọ ọ keghi vbe runran avbe ọba nekhua.