Psalm 75 - Edo Bible (E Baibol Ẹdo) Version 1996

Osanobua Ne Nọbuohiẹn

¹ Ma rhie ekpọnmwẹ ne uẹn Osanobua ma rhie ekpọnmwẹ nuẹn ma tae ladian vbene uwẹ kpọlọ hẹ ma kevbe na iyẹn iwinna ọyunnuan nibun ne uwẹ winnaẹn.

² “Mẹ rhie ẹghẹ ne I gha ya bu ohiẹn ye otọe nẹ,” erriọ Osanobua khare. “Ohiẹn ne ai na ghe ikpanro ọ re I ra bu.

³ Avbe emwi ne a yi hia gha rhe gha guọ ighẹ a vbe mu agbọn tobọre rueghe I gha gie ẹyotọ ẹre de ziẹn.

⁴ I tama emwa dan wẹẹ, ne iran ghẹ ghi hio,

⁵ I tama iran ne iran dobọ orhuọ iran yi.”

⁶ Ẹ i re odẹ ahọ ra odẹ orrie ọ re ibuohiẹn ke rre ẹ i re odẹ okuọ ra odẹ ekẹn.

⁷ Osanobua ọrọre nọ bu ohiẹn ọ gha bu asẹ ne eso ọ gha bu abe gbe eso.

⁸ E Nọyaẹnmwa mu ukpu ọkpa mwẹ obọ ọ vuọn ne ayọn nọ wegbe ọghe izohu ẹre, ọ sa ẹe ladian avbe emwa dan keghi dae, iran dae ya sẹ ototọ ukpu fẹẹrẹ.

⁹ Sokpan, mẹ i ra dobọ ẹmwẹ Osanobua Jekọb ne a ta yi ra nene ihuan urhomwẹ, ne I so ghe ẹre.

¹⁰ Ọ gha guọghọ ẹtin emwa dan sokpan a gha rhie ba ẹtin ọghe emwa ẹmwata.