Psalm 74 - Edo Bible (E Baibol Ẹdo) Version 1996

Erhunmwu Imiẹnfan Ẹvbo

¹ Vbọzẹ ne u na sẹ ima rae vbenian yi Osanobua? U gha wa mu ohu ghe emwa ruẹn rhinrin ẹdẹ ra?

² Ye avbe emwa ruẹn rre, ne u tobọ zẹ ne egbe ruẹ, ke ẹghẹ ne ọ kpẹre gha dee, emwa ne uwẹ viọ ke uwu ọviẹn ladian ne iran do gha re ẹwae ruẹ. Ye Oke Zaiọn rre ehe ne uwẹ ka dia yi.

³ Khian la emwi ni rẹnkhuan na gberra avbe eghian mwa rẹnkhẹn emwi ni rre Ọgua Osa fo.

⁴ Avbe eghian ruẹn ya gbe ọvẹ akhọnmiotọ vbe uwu Ọgua Osa ruẹ. Iran ya mu afiala iran ye evba zẹ vbe ama akhọnmiotọ.

⁵ Iran yevbe emwa ni gia erhan iran gha ya ughanmwa iran tọnnọ erhan kua.

⁶ Iran ye ughanmwa kevbe umọmọ iran, guọghọ avbe uhanhan erhan ni rrọ.

⁷ Iran rhia Ọgua Osa ruẹ ua, iran keghi mu erhẹn yọ iran mu awua ye ehe ne a na ga uwẹ.

⁸ Iran te ho ne iran wa rẹnkhẹn ima fẹẹrẹ, iran keghi ya erhẹn giẹn ehe ni huanrẹn hia ni rre ẹvbo ni sẹ otọ.

⁹ Avbe emwi iruẹmwi ni huanrẹn hia, ne ima mwẹ fo, akhasẹ ma ghi vbe keẹ, orhiọnkpa ne ọ rẹnrẹn vbene ọna gha kpee sẹ hẹ vbe otọ i rrọ.

¹⁰ Vbe avbe eghian mwa ra giẹ uwẹ kpee sẹ hẹ vbe otọ yi Nọyaẹnmwa? Iran gha kpa unu ghe eni ruẹn rhinrin ẹdẹ ra?

¹¹ Vbọzẹ ne u na he ne u yi ima obọ yi? Vbua ghi na viọ obọ ghe odieke hẹ yi?

¹² Sokpan, ke omuhẹn gha dee, wẹ ọrọre Osanobua ima ẹghẹ nibun ọre u he na miẹn ima fan.

¹³ Ẹtin ruẹn nọkhua ọre u ya wa okun ye ihe eva, u na salọ uhunmwu avbe Ugbogiorinmwi ẹzẹ kua.

¹⁴ U guọghọ uhunmwu e Leviatan ne ugbogiorinmwi amẹ, u na ya ikun ẹnrẹn koko aranmwẹ ato.

¹⁵ U ruẹe ne uhunmwu ẹzẹ kevbe ivbi ẹzẹ gha lẹẹ u kevbe silo avbe ẹzẹ nekhua ka.

¹⁶ Wẹ ọ re ọ yi avan kevbe asọn wẹ ọ re ọ mu owẹn kevbe uki ye ihe iran.

¹⁷ Wẹ ọ re ọ mwa ehe ne agbọn sẹe wẹ ọ re ọ yi ẹghẹ owowo kevbe oni.

¹⁸ Sokpan, yerre Nọyaẹnmwa wẹẹ avbe eghian an wa giọ ọ kevbe wẹ iran ma rẹn ruẹn iran vbe zan ruẹn.

¹⁹ Ghẹ sẹ avbe emwa ruẹn ne ẹtin fo nẹ rae, ne eghian iran ne emwa dan. Ghẹ mianmian emwa ruẹn ne iran zẹ kpokpo.

²⁰ Ye ile ne u gu ima ta rre. Uyimwẹ ika wa rre ẹkhokho ni so ebiebi hia vbe otọe nii.

²¹ Ghẹ gi ekhue mu ọmwa ne a zẹ kpokpo, gie avbe ivbiogue kevbe ne ẹ i mwẹ nii, gha rho ruẹ.

²² Rhiọrre Osanobua ne u khọn ekhae ne egbe ruẹ, yerre wẹ, avbe emwa ni ma rẹn ruẹn wa giẹ uwẹ ne ebi ro.

²³ Ghẹ mianmian uvannọ mwẹ ohu ọghe avbe eghian ruẹn, kevbe owogho ne a i na dobọyi ne avbe eghian ruẹn gbe.