Psalm 73 - Edo Bible (E Baibol Ẹdo) Version 1996

EBE NE OGIEHA ( Psalm 73—89 ) Ohiẹn Ẹmwata Osanobua

¹ Osanobua wa ya obọ esi mu Izrẹl avbe iran ne ekhọe esi ni rrọọ.

² Sokpan iro te han mwẹ nẹ, te iyayi mwẹ ghi te ra wirua.

³ Rhunmwuda, I kegha gbe ọ ma kan uwa ne iran ni tọn egbe mu, vbe I miẹn wẹ emwi wa dinna odẹ ne emwa dan.

⁴ Iran i miẹn obalọ, iran wegbe egbe rran iran.

⁵ Iran i rri oya vbene emwa ọvbehe re, iran i miẹn ọlọghọmwa ne emwa ọvbehe miẹn.

⁶ Rhunmwuda ọnii, iran ghi ya itengbemu tee egbe, zẹ vbe emwiurhu, kevbe ọkpankpan, zẹvbe ẹwu.

⁷ Ekhọe iran ghi gha hihiẹ ọkhọ ladian, ekhọe iran ghi gha zẹ iro emwi dan.

⁸ Iran ghi gha giẹ emwa ọvbehe iran ghi gha guan ẹmwẹ emwi dan iran tọn egbe mu, iran keghi zẹ iro vbene iran gha wọ ọmwa ọvbehe uhunmwu hẹ.

⁹ Iran ta Osanobua ẹrinmwi ọtakhọ, iran ghi gha giẹ emwa uhunmwu ọpakharha vbe agbọn.

¹⁰ Sẹrriọ wẹ emwa Osanobua tobọ ẹre ghi gha bu iran yo. Iran ghi gha zẹgiẹ ya ẹmwẹ iran yi.

¹¹ Iran khare wẹẹ, “Osanobua i ra rẹn, ne ọ yo sẹẹ i ra gualọ ẹe miẹn.”

¹² Erriọ iran ne emwa dan ye. Iran mwẹ emwi ọrhẹnrhẹn te iran ye miẹn nibun ba ẹre.

¹³ Te imẹ ghi wa da egbe mwẹ yi kua kẹkan ra? vbe ne I ima na ru orukhọ?

¹⁴ Osanobua, u gunmwẹ rri oya ne ebi ro, owiẹ owiẹ ọre u ya rriọmwẹ oya.

¹⁵ Akpawẹ te I ta egbe ẹmwẹ vberriọ mẹ i ghẹ yin uyinmwẹ emwa ruẹn.

¹⁶ I keghi te gha hia ne I miẹn otọ emwi na, sokpan ọ wa wegbe sẹ mwẹ.

¹⁷ Rhinrin mẹ te do gha rriẹ Ọgua Osa ruẹ, I keghi do rẹn emwi ne ọ ra rruan ọmwa dan.

¹⁸ Te uwẹ ra viọ iran ye ehe ni miọnghọn, u ghi gie iran dele la ọrhiae rriẹ.

¹⁹ A fuẹn iran an vbe udomwurri, ufomwẹ iran keghi khọrhiọn.

²⁰ Iran yevbe imina ne ọ fo vbe owiẹ, wẹ gha guakpao Osanobua a ghi ho iran bẹkun.

²¹ Ẹghẹ ne iro ekhọe mwẹ na gha rriara, ne egbe ne ọ ma mwẹ emwi na balọ mwẹ,

²² I keghi wa kọn de ẹwe ua, I ma rẹn emwi ne uwẹ gha a ru.

²³ Vberriọ te I wa simama uwẹ vbe ẹghẹ hia, wẹ keghi vbe da mwẹ obọ yi.

²⁴ U ya ẹmwẹ igiodẹ ruẹ su mwẹ, u ghi ya ọghọ da obọ miẹn mwẹ vbe okiekie.

²⁵ Demwi ọvbehe ne I mwẹ vbe ẹrinmwi gberra uwẹ? Ugbẹn vbe I ghi mwẹ uwẹ nẹ, de emwi ọvbehe ne I ye ho vbe agbọn?

²⁶ Egbe sẹtin wọ mwẹ ne ẹtin vbe fo mwẹ, sokpan, Osanobua ọrọre ẹtin mwẹ emwi okpa ne I gbinna ho ọrọre irẹn.

²⁷ Ẹ i mwẹ iran ni he uwẹ ye otọ ma fuẹn uan, wẹ gha fuẹn iran an ighe emwa ni ma guobọ ruẹ.

²⁸ Zẹvbe ọghomwẹ, u miẹn vbe ọ rhiẹnrhiẹn hẹ ne a sikẹ Osanobua! Ne Osanobua ne Udazi gha re ọmwa ne a lẹ gbinna, kevbe ne a gha na iyẹn emwi ne ọ he ru hia!