Psalm 72 - Edo Bible (E Baibol Ẹdo) Version 1996

Erhunmwu Ne Ọba

¹ Osanobua, ma ọba ẹre ne ọ gha ya ẹmwata ruẹ bu ohiẹn ghae ne ẹẹn vbe uwu atẹmwata ruẹ.

² Ne ọ miẹn ehe na gha ya ẹmwata khaemwisẹ yan emwa ruẹn. Kevbe ne ọ vbe ya ẹmwata gha kha yan avbe emwa ne a zẹ kpokpo.

³ Te otọe nii gha miẹn ọmaa rhie vbene iran gha na gha mwẹ ẹfe te iran gha vbe mwẹ oghae ẹmwata.

⁴ Te ọba gha sẹtin gha bu ohiẹn ẹse ne avbe ivbiogue. Te ọ gha ru iyobọ ne ne ẹ i mwẹ ne obọ ẹre vbe gba avbe eghian iran.

⁵ Te emwa ruẹn gha ga a la ẹghẹ ne ovẹn vbe yunmwu la, kevbe ẹghẹ ne uki vbe baa la, rhinrin yasẹ orre ni dee.

⁶ Te ọba gha yevbe amẹ ne ọ rhọ ye ugbo, zẹ vbe okpamẹ ne ọ rhọ ye otọe.

⁷ Te uyinmwẹ ẹmwata gha muan yọ vbe ẹghẹ ọre, te ẹfe gha kpee vbe otọ la ẹghẹ ne uki gha ba la.

⁸ Otọ arriọba ẹre gha ke okun ọkpa sẹ ọvbehe ke Yufretes kpao yasẹ ehe ne agbọn sẹe.

⁹ Iran ni rre ato, gha vbẹrre nẹẹn avbe eghian rẹn gha mu ẹko rhu otọ ne ẹẹn.

¹⁰ Avbe ọba e Spen kevbe iran ni rre otọ ne amẹ lẹga gha zẹ ẹfe gie ẹe. avbe ọba avbe Arrebia kevbe Etiopia gha viọ imuohan gie ẹe.

¹¹ Avbe ọba hia gha vbẹrre vbe odaro ẹre; avbe agbọn ẹvbo hia gha ga ẹe.

¹² Rẹn miẹn avbe ivbiogue, ni kpe tie ẹre fan deba iran ne ẹ i mwẹ kevbe ne a he.

¹³ Ọ tohan iran ni ma wegbe kevbe ivbiogue, ọ ghi vbe gie iran ni vbabọ miẹn uhunmwu.

¹⁴ Ọ miẹn iran fan hin obọ, a zẹ ọmwa kpokpo kevbe ọkpankpan, ighobioye ọ re ẹdagbọn iran khin ne ẹẹn.

¹⁵ Ọba gha tọ ọ kpẹre! Te a gha ke Arebia viọ igoru gie ẹe. Ne a gha na erhunmwu nibun ne ẹẹn vbe ẹghẹ hia. Te afiangbe Osanobua gha rre ọ re uhunmwu vbe ẹghẹ hia!

¹⁶ Te evbare gha kpọ vbe otọe nii; te emwiokọ gha gha uhunmwu oke hia ne iran gha mọ zẹ vbe ọghe Lebanọn. Te emwa gha gba ore ẹvbo hia, zẹ vbe oha ne ọ vuọn ne irunmwu.

¹⁷ Ai ghẹ mianmian eni ọba ẹdẹ te otiti ẹre gha tọ zẹvbe owẹn, te agbọn ẹvbo hia gha tian rẹn, te iran gha wẹ ne Osanobua fiangbe iran ne iran vbe gha gualọ ọyẹnmwẹ ne ọba.

¹⁸ Wa rho e Nọyaẹnmwa ne Osanobua Izrẹl! Rẹn ọkpa kẹkan, ọ re ọ ru avbe emwi ọyunnuan na hia.

¹⁹ Wa rho eni ẹnrẹn ne ọ mwẹ uyi ẹdẹdẹmwẹdẹ. Te uyi ẹre gha gha otọ agbọn hia. Isẹ! Isẹ!

²⁰ Emwana ọrọre ufomwẹ erhunmwu e Devid ne ovbi e Jese.