Psalm 71 - Edo Bible (E Baibol Ẹdo) Version 1996

Erhunmwu Ọmaẹn

¹ Nọyaẹnmwa, wẹ ọ re imẹ lẹgbinna, ghẹ gie obọ gba mwẹ.

² Rhunmwuda ighẹ ọmwata wẹ khin, yọmwẹ obọ ne u miẹn mwẹ fan. Danmwehọ mwẹ, ne u yuo mwẹ ladian.

³ Gha re ugue mwẹ ne ẹ i firaa, kevbe odin ọkhẹ nọ wegbe, ne ọ degue mwẹ. Wẹ ọrọre ugue kevbe ne ọ gbinna mẹ.

⁴ Osanobua mwẹ, yuo mwẹ hin obọ emwa dan rre, hin obọ ẹtin emwa ne ekhọe ẹre rri, kevbe emwa dan.

⁵ Ọba Nọyaẹnmwa, uwu uwẹ mẹ na mwẹ idaehọ, wẹ ọ re I mu ẹtin yan ke ẹghẹ ọvbokhan mwẹ gha dee.

⁶ Wẹ ọ re I ya egbe yan vbe ẹdẹ agbọn mwẹ hia wẹ ọ re ọ degue mwẹ ke ẹdẹ ne a biẹ mwẹ gha dee. Mẹ gha rho ruẹ rhinrin ẹdẹ.

⁷ Ne a ghe ru, ọ re ẹdagbọn mwẹ wa khin, ne emwa nibun. Rhunmwuda, wẹ ọrọre ugue mwẹ nọ wegbe.

⁸ Te imẹ ra rho ruẹ ne ebi ro, I ghi vbe gha wewe uyi ruẹ.

⁹ Ghẹ he mwẹ ye otọ, vbe I khian ọmaẹn nẹ nian. Ghẹ fi iyeke gbe mwẹ vbe egbe mwẹ guọghọ nẹ.

¹⁰ Avbe eghian mwẹ ho ne iran gbe mwẹ uan, iran gha zẹ iro iran keghi vbe khuan khẹ mwẹ.

¹¹ Iran wẹẹ, “Osanobua hee ẹe ye otọ nẹ wa gia khu ẹe ne a muẹn ọmwa ne ọ gha miẹn rẹn fan i rrọọ.”

¹² Ghẹ khian rrei Osanobua; Osanobua mwẹ, zẹgiẹ gha dee do yọmwẹ obọ!

¹³ Te obọ gha gba iran ni gun mwẹ gbinna ne a fuẹn iran an. Te a gha ya ekhue mu iran, ni ho ne iran kuan mwẹ, ne a vbe fa iran an.

¹⁴ Mẹ gha mwẹ idaehọ, vbe uwu uwẹ rhinrin ẹdẹ.

¹⁵ I gha na iyẹn umamwẹ ruẹn ne ebi ro I gha na iyẹn imiẹnfan ruẹn a gha rhe miẹn wẹ ọ gberra ne imẹ gha sẹtin rẹn otọ ẹre.

¹⁶ I gha rho ẹtin ruẹn, Nọyaẹnmwa Osanobua I gha mu ẹmwẹ umamwẹ ruẹn go, ọwuẹ okpa kẹkan.

¹⁷ Ẹghẹ ne I na ye kherhe ọ re u na ma mwẹ re te I ye na iyẹn iwinna ọyunnuan.

¹⁸ Ugbẹn vbe I ghi khian ọmaẹn nẹ nian vbe I ghi fu edẹ, ghẹ he mwẹ ye otọ Nọyaẹnmwa! Gun mwẹ gha rrọ vbe I a gha na iyẹn, ẹtin kevbe iwegbe ruẹ, ma avbe orre ni gha he rre.

¹⁹ Osanobua, ẹmwata ruẹ sẹ aro iso. Wẹ winna iwinna ọyunnuan nibun nẹ; ọmwa ne ọ ye vbe uwẹ i rrọ.

²⁰ U si ọlọghọmwa kevbe usẹ yọmwẹ egbe, sokpan, u gha rhie ẹtin mwẹ dọlegbe mẹ, u gha mu mwẹ lẹ ne idin.

²¹ U gha ya mwẹ kpọlọ sẹ vbene I te ye ẹdẹ, u gha dọlegbe fu mwẹ ẹko rre.

²² I gha gele ye akpata rho ruẹ, I gha rho a gia mu ẹtin yan ruẹn, Osanobua mwẹ I gha ye akpata mwẹ so ihuan ghe ruẹ ọmwa Ne ọ huanrẹn ọghe Izrẹl.

²³ I gha wee uwemwẹ oghọghọ vbe ẹghẹ ne I ya kpe emwi nuẹn I gha ya ẹtin mwẹ hia so ihuan, rhunmwuda, wẹ miẹn mwẹ fan nẹ. I gha dọlegbe gha rho ruẹ sayọ.

²⁴ I gha na iyẹn umamwẹ ruẹn ne ebi ro, rhunmwuda, iran ni te ho ne iran kuan mwẹ, obọ gba iran a keghi fa iran an.