Psalm 7 - Edo Bible (E Baibol Ẹdo) Version 1996

Erhunmwu Ohiẹn Ẹmwata

¹ E Nọyaẹnmwa Osanobua mwẹ, I bu ruẹ rre ne I do lẹ gbinna an. Fan mwẹ ye otọ, ne u vbe miẹn mwẹ fan vbe obọ iran ni khu mwẹ khian.

² Ne iran ghẹ ya mu mwẹ gha rriẹ, zẹ vbe oduma, vbe ne ọmiọnmwafan i na rrọọ. Iran ghi yanghan mwẹ ye otọ, ukhiọnmwẹ ukhiọnmwẹ.

^3-4 E Nọyaẹnmwa Osanobua mwẹ, adeghẹ I fidọn ghe ọmwaikọmwa. I gha ya ọse mwẹ ne a vbokho ra ne I ye oghodan san ọmwa ẹse, adeghẹ I ru ọkpa vbe uwu avbe emwi na hia

⁵ gie eghian mwẹ khu mwẹ ne obọ iran vbe vba mwẹ. Gie iran rhie mwẹ fianmwẹ otọ, ne iran gbe mwẹ uan, ne iran vbe sẹ ikun mwẹ rae ye evba.

⁶ Guakpao vbe ohu ruẹ Nọyaẹnmwa. Kpaegbe mu aro igbinna da okuosu avbe eghian mwẹ, guọnmwẹ egbe ne u do yọmwẹ obọ. Ohiẹn ẹmwata ọre uwẹ gualọ.

⁷ Rhunmwuda ọnii, si avbe emwa ni hia koko gaga egbe, ne u ke odukhunmwu gha khaemwisẹ yan iran.

⁸ Wẹ ọrọre nọbuohiẹn emwa hia. Bu asẹ mẹ Nọyaẹnmwa. Wẹ rẹnrẹn wẹ mẹ ma rri abe.

⁹ Osanobua ẹmwata ọ re uwẹ khin, wẹ keghi vbe bu ohiẹn iro ne ima zẹ, kevbe emwi ne ima ho. Dobọ emwi dan avbe emwa dan yi. Ne u vbe san avbe emwa esi ẹse.

¹⁰ Osanobua ọrọre ne ọ degue mwẹ, rẹn vbe miẹn iran ni họn ẹmwẹ ne ẹẹn fan.

¹¹ Nọ bu ohiẹn ẹmwata ọre Osanobua khin. Ọ vbe bu abe gbe emwa dan vbe ẹghẹ hia.

¹² A deghẹ iran ma fi ekhọe werriẹ, Osanobua gha lọ umozo ẹre. Ọ si uhanbọ ẹre tua nẹ, ọ vbe rhuẹ ọre ye otọ nẹ.

¹³ Ọ viọ emwi igbinna rẹn ne ẹi gbe emwi kẹe mwẹ nẹ. Ọ vbe ya ifẹnmwẹ erhẹn ọnrẹn kọn emwi nẹ,

¹⁴ Ghe vbene emwa dan zẹ iro dan hẹ: Iran ghi gha khuẹn ifi ọlọghọmwa, iran ghi gha do ẹki erẹrẹ.

¹⁵ Sokpan, ifi ne iran te khuẹn khẹ ẹrrẹe, iran tobọ iran ọ re ọ ghi mu.

¹⁶ Rhunmwuda ọnii, iran ọ re ọ ghi rrioya ye ọkhọ ne iran ru. Iran ọ re ọkpankpan iran ghi kuan ẹre egbe.

¹⁷ I kpọnmwẹ e Nọyaẹnmwa ye ohiẹn ẹmwata ne ọ bu. I so ihuan urhomwẹ ghe Nọyaẹnmwa, ne ọ re Ne ọ yo sẹẹ Ehia.