Psalm 69 - Edo Bible (E Baibol Ẹdo) Version 1996

Utumwẹ Ye Iyobọ

¹ Osanobua, miẹn mwẹ fan amẹ ne ọ vuọn sẹ mwẹ ẹyaẹn nẹ.

² Te I dinmwi ye uwu ọrho ne ọ dinmwi otọe ne ọ kae i rrọ, uwu odin ọ re I wa ye te ubimwẹ amẹ ghi ra gbe mwẹ ye ẹzẹ.

³ Egbe wọ mwẹ ne I ya tu nọ iyobọ, urhu mwẹ vbe kaka te aro mwẹ ghi vbọ ne I ya gualọ iyobọ ruẹ.

⁴ Iran ni khuiwu mwẹ vbe ne a i na mwẹ otọ bun sẹ eto ne uhunmwu mwẹ. Avbe eghian mwẹ mu ohoghe ba mwẹ, iran wegbe, iran kevbe ho ne iran gbe mwẹ uan. Iran mu mwẹ gha ha osa emwi ne I ma rhie.

⁵ Osanobua, a ma viọ orukhọ mwẹ lẹre nuẹn wẹ rẹn vbene I kọn sẹ hẹ ẹdẹ.

⁶ Ghẹ gun mwẹ ya ekhue mu iran ni mu ẹtin iran ya ruẹn, Ọba, e Nọyaẹnmwa ne Oghodua! Ghẹ gun mwẹ fa iran ni gaa a Osanobua Izrẹl.

⁷ Rhunmwuda ruẹ ọ re a na tie ihẹn mẹ, ne a na vbe ya ekhue rhu mwẹ ginna otọ.

⁸ Te I yevbe orhunmwuyẹn ne avbe etẹn mwẹ, zẹ vbe ọrriọvbe ne ẹgbẹe mwẹ.

⁹ Vbe ne I mu aro ye ẹmwẹ Ọgua Osa ruẹ hẹ giẹn vbe uwu imẹ zẹ vbe erhẹn, unu ne a filo guẹ hia dele yan mwẹ.

¹⁰ I yo aguẹ ya mu egbe mwẹ rriotọ, emwa keghi gha zan mwẹ.

¹¹ I viọ ukpọn akhiẹ ye egbe, iran na vbe gha giẹ mwẹ.

¹² Ẹmwẹ mwẹ iran ta khian vbe odẹ, mẹ ọ re avbe ọdayọn ghi ya so ihuan.

¹³ Sokpan zẹ vbe ọghomwẹ, mẹ gha na erhunmwu ghe ruẹ Nọyaẹnmwa, Osanobua, zẹ ẹmwẹ wanniẹn mwẹ, vbe ẹghẹ ne ọ khọn ruẹn. Zẹ ẹmwẹ wanniẹn mwẹ rhunmwuda wẹ mu ẹẹn sẹ ighe eyan ruẹn wẹ u gha miẹn ọmwa fan.

¹⁴ Miẹn mwẹ fan ne I ghẹ dinmwi ye uwu ọrho, miẹn mwẹ fan vbe obọ avbe eghian mwẹ, ne I fe vbe obọ odin amẹ.

¹⁵ Ghẹ gie amẹ ni lẹ rhu mwẹ, ghẹ gie ẹzẹ gbe mwẹ ye uwu odin, ra ne I dinmwi la uwu idin.

¹⁶ Rhie ewanniẹn mẹ Nọyaẹnmwa, vbe umamwẹ aho ruẹ ne ẹ i beghe vbe uwu itohan ruẹn nọkhua, gbe bu mwẹ rre!

¹⁷ Ghẹ rhie egbe lẹre ne ọguọmwadia ruẹ, uwu ibaro nọkhua ọre I ye na, zẹ ẹmwẹ wanniẹn mwẹ nian.

¹⁸ Bu mwẹ gha dee ne u do miẹn mwẹ fan, rhan mwẹ ye otọ hin obọ avbe eghian mwẹ rre.

¹⁹ U rẹnrẹn vbene emwa rhovbiẹ mwẹ hẹ, vbene iran fa mwẹ uan kevbe vbene iran ya oya mẹ hẹ u bẹghe avbe eghian mwẹ hia.

²⁰ Ihẹn ne iran tie ya ekhọe mwẹ rhia, emwi hia wa khan mwẹ. Te I te rhie aro ye itohan, sokpan I ma miẹn, I te rhie aro ye egberọkhọmwẹ sokpan, ọ ma sẹ mwẹ obọ.

²¹ Ẹghẹ ne ohanmwẹ na gha gbe mwẹ iran keghi rhie eruan mẹ, ẹghẹ ne ovbamẹ na gha gbe mwẹ iran keghi mu okikan gun mwẹ.

²² Te evbare eghọ iran, gha gbe iran okọ ye ẹzẹ, te evbare iruẹmwi ne iran le gha mu iran gbotọ.

²³ Rhu iran aro, ne u gie uviẹn iyeke gha kpe iran.

²⁴ Hihiẹ ohu ruẹ yan iran, gie obọ izohu ruẹ vba iran.

²⁵ Te agọ iran gha vẹ kua ai gha miẹn ọmwa ne ọ gha miẹn uhunmwu vbe owa ukpọn iran.

²⁶ Iran keghi gha zẹ emwa ne uwẹ rri ọre oya kpokpo iran kegha na iyẹn emwa ne uwẹ kuanrẹn.

²⁷ Gbẹnnẹ orukhọ iran hia yotọ ghẹ gie iran mwẹ oghae vbe imiẹnfan ruẹn.

²⁸ Te a gha khiẹn eni iran hin ẹbe emwa ni rre agbọn rre; ai gha ka iran ba emwa ruẹn.

²⁹ Sokpan, uwu obalọ kevbe ẹtinfomwẹ ọ re imẹ ye, si mwẹ kpaegbe, Osanobua, ne u miẹn mwẹ fan!

³⁰ I gha so ihuan ya rho Osanobua I gha kpọnmwẹ ọẹn, ne I ya rhie ukpọlọmwẹ ọnrẹn maa.

³¹ Ọ na gha yẹ Nọyaẹnmwa sẹẹ ne I gha mu ẹmila ne ẹẹn, ra ne I ya ẹkhuia ne ọ dido zọ ese ne ẹẹn.

³² Iran ne a zẹ kpokpo gha miẹn ọna, ẹko gha rhiẹnrhiẹn iran. Ọna gha rhie igiẹdu ne iran ni ga Nọyaẹnmwa.

³³ E Nọyaẹnmwa danmwehọ iran ne ẹ i mwẹ, ẹ i vbe mianmian iran ni rre ẹwẹdọ.

³⁴ Wa rho Osanobua, ẹrinmwi kevbe agbọn, avbe okun kevbe emwi hia ni rre uwu iran.

³⁵ Ọ gha miẹn Jerusalẹm fan, ọ ghi dọlọ ẹvbo ni rre Juda bọlọ. Emwa rẹn ghi gha rre evba, iran ghi yan otọe nii, ivbi uniẹn eguọmwadia ẹre gha rri oẹ vbe ukhu.

³⁶ Iran ni ho ẹmwẹ ọnrẹn gha yin evba nii.