Psalm 68 - Edo Bible (E Baibol Ẹdo) Version 1996

Ihuan Akhọnmiotọ Ọghe Ẹvbohoho

¹ E Nọyaẹnmwa gua kpaegbe, ọ keghi zagha avbe eghian rẹn kua ọ munọ iran ni sọtẹ ghe ẹre gbotọ iran keghi lẹẹ.

² Zẹ vbene a hoho ighogho kua, erriọ ọ re ọ hoho iran gha rriẹ. Zẹ vbene odan ranran vbe erhẹn erriọ ọ re emwa dan lua vbe odaro Osanobua.

³ Sokpan, avbe ẹmwata ghọghọ iran keghi vbe sẹ ọyẹnmwẹ vbe odaro ẹre ẹko rhiẹnrhiẹn iran, iran keghi vbe we uwemwẹ oghọghọ.

⁴ Wa so ihuan ghe Osanobua wa so ihuan urhomwẹ ghe eni ẹnrẹn, wa zẹ odẹ nẹ ọmwa ne ọ hin okuku amẹ khian. Nọyaẹnmwa ọ re a tie ẹre, wa gha sẹ ọyẹnmwẹ vbe eni ẹnrẹn.

⁵ Osanobua ne ọ rre uwu Ọgua Osa ẹre nọhuanrẹn gbearoghe ọ re ọ gbearoghe avbe emọ ni i mwẹ erha rẹn ọ re ọ degue avbe ẹgbẹe.

⁶ Ọ rhie owa ne ọmwa ne ọ rre uwu ohioro dia, ọ keghi vbe viọ iran ni rre ẹwẹdọ ladian, gha rriẹ oghọghọ ọmwa ne ẹ i rre imu. Sokpan, iran ni sọtẹ gha rre otọe ne ọ dihoi rua.

⁷ Osanobua, ẹkpo ne u na viọ avbe emwa ruẹn ladian, ẹghẹ ne u na la ato gberra,

⁸ otọe mu rueghe, iso kevbe rhọ amẹ yotọ rhunmwuda ighẹ Osanobua Sainai dee, rhunmwuda ighẹ Osanobua Izrẹl dee.

⁹ U gie amẹ kakabọ rhọ u keghi dọlọ otọe ruẹ ne ọ te fafaa yi.

¹⁰ Emwa ruẹn bọlọ owa iran ye evba, rhunmwuda umamwẹ ruẹn, u keghi kpehe ne avbe ivbiogue.

¹¹ E Nọyaẹnmwa gie uhunmwu, emwa nibun ọ re ọ vbe na iyẹn nii.

¹² Avbe ọba kevbe iyokuo iran lẹ rriẹ, ikhuo ni rre owa keghi ghae emwi ne obọ vbare vbe okuo.

¹³ Amazẹ idu ne a ya esiliva rhu ne ifuẹn ọnrẹn fi wainwain ne igoru. (Vbọzẹ ne eso vbe uwu uwa na gha rre uwu aza ohuan vbe ẹdẹ igbinna yi?)

¹⁴ Ẹghẹ ne Osanobua ne Oghodua na zagha avbe ọba kua vbe Zalmọn ọ keghi gie esia de ye evba.

¹⁵ U miẹn vbe oke Basian kpọlọ hẹ, oke ne ọ mwẹ ukpe nibun nọ.

¹⁶ Vbọzẹ ne u na ye otilua ke odukhunmwu oke ruẹ, gha ghe oke nii ne Osanobua zẹe wẹ rẹn gha dia yi? E Nọyaẹnmwa gha di evba ya rhinrin ẹdẹ.

¹⁷ E Nọyaẹnmwa tuorre ke Sainai gha dee ke irẹn kevbe ikẹkẹ okuo nekhua arriaisẹn inu ne ọ khin gha rrie uwu ehe ne ọ huanrẹn ọghọe.

¹⁸ Ọ hin odukhunmwu gha rriẹ ehe ne ọ yo ọ viọ avbe oghunmwu nibun mwẹ gha khian ọ keghi vbe miẹn emwi ihaoko, vbe obọ avbe emwa ni sọtẹ. E Nọyaẹnmwa Osanobua gha di evba nii ya.

¹⁹ Wa rho e Nọyaẹnmwa ne ọ mu ihẹ mwa ẹdẹgbegbe rẹn ọrọre Osanobua ne ọ miẹn mwa fan.

²⁰ Osanobua mwa Osanobua ne ọ miẹn ọmwa fan ọre nọ rẹn ọrọre Nọyaẹnmwa, ne Nọyaẹnmwa ne ọ wọlọ ọmwa ladian hin uwu rre.

²¹ Ẹ i mwẹ Nọyaẹnmwa ma va iran ne eghian rẹn uhunmwu. Ọghe avbe iran ni wa rhie egbe ye ẹmwẹ orukhọ iran.

²² E Nọyaẹnmwa khare wẹẹ, “I gha viọ avbe eghian uwa dọlegbe ke Basian gha dee, I gha viọ iran werriegbe ke ototọ ẹzẹ okun gha dee.

²³ Ne uwa miẹn ehe na tubu vbe uwu esagiẹn iran, kevbe ne avbe ekita uwa vbe lalọ vbọ vbe ne iran ho.”

²⁴ Osanobua, emwa hia bẹghe ọbọbọ akhọnmiotọ ruẹ, vbe ne Osanobua, ọba mwẹ ya na na la uwu owa ne ọ huanrẹn ọghọe hẹ.

²⁵ Avbe ọsian ke odaro avbe ikpemaba keghi lele iran iyeke avbe ibiẹka ikhuo ni kpe isẹ keghi rre ẹkpo iran.

²⁶ “Wa rho Osanobua vbe ehe ne avbe emwa rẹn ni do iko ye wa rho e Nọyaẹnmwa wa ne ivbi uniẹn ẹ Jekọb hia!”

²⁷ E Bẹnjamin ne ẹwae ne ọ kanmwa sẹ ke odaro vbe iyekọnii, avbe ọkaolotu e Juda kevbe otu iran, avbe ọkaolotu e Zẹbulọn kevbe Naftali keghi lele ẹe.

²⁸ Osanobua, rhie ẹtin ruẹn maa, ẹtin ni ne u ya gbinna ne ima.

²⁹ Ke Ọgua Osa ruẹ ne ọ rre Jerusalẹm gha dee, ehe ne avbe ọba na viọ imuohan guẹ.

³⁰ Gu ẹe gui ighe Igipt nii ne aranmwẹ ọkhọ ne ọ rre uwu irunmwu, gu avbe agbọn ẹvbo gui avbe oghẹn ẹmila nii, deba avbe ẹkhuia iran negiẹrẹ rhinrin iran te do de ya igue viọ avbe esiliva iran guẹ. Zagha iran ne okuo yẹ kua.

³¹ Iran ne ukọ ẹvbo gha ke Igipt rre avbe ivbi e Sudan, gha tọn obọ mu na erhunmwu ghe Osanobua.

³² Wa so ihuan ghe Osanobua wa ne otọe arriọba agbọn, wa so ihuan urhomwẹ ghe Nọyaẹnmwa.

³³ Ghe irẹn nii ne ọ hin khian vbe iso ẹvbo nẹdẹ nii wa danmwehọ ẹre vbe ọ ya urhu ne ọ la davan.

³⁴ Wa na iyẹn ẹtin Osanobua ladian ẹtin ọba ẹre keghi vbe rre iso.

³⁵ Wẹ miẹn vbe Osanobua muohan hẹ vbe ọ die owa ẹre nọhuanrẹn Osanobua Izrẹl! Ọ rhie iwegbe kevbe ẹtin ne emwa rẹn! Wa rho e Nọyaẹnmwa!