Psalm 66 - Edo Bible (E Baibol Ẹdo) Version 1996

Ihuan Urhomwẹ Kevbe Ekpọnmwẹ

¹ Wa we uwemwẹ oghọghọ ya rho e Nọyaẹnmwa wa ne emwa hia.

² Wa so ihuan uyi eni ẹnrẹn wa rhie urhomwẹ uyi ne ẹẹn.

³ Wa tama Osanobua wẹẹ, “A miẹn vbe emwi ne u ru hia re ọyunnuan hẹ! Ẹtin ruẹn kpọlọ sẹ vberriọ wẹ te avbe eghian ruẹn hia ye ohan defi igue vbe odaro ruẹ.

⁴ Emwa ni rre agbọn hia ọ re ọ ga a iran ghi gha so ihuan urhomwẹ ghe ruẹ iran ghi gha so ihuan urhomwẹ ghe eni ruẹn.”

⁵ Wa do ghe iwinna ne Osanobua winna ẹn, iwinna ọyunnuan rẹn vbe uwu ẹbu emwa.

⁶ Ọ ye okun khian otọe ne ọ kae, avbe erha mwa odede keghi ya owẹ fian ẹzẹ rra. Ma ghọghọe ye emwi ne ọ ru vbe evba nii.

⁷ Ẹtin ẹnrẹn ọ re ọ ya khaemwisẹ, rhinrin ẹdẹ. Ọ rhie aro ye otọ vbe egbe avbe agbọn ẹvbo wa ghẹ gie avbe etẹ sọtẹ ọre.

⁸ Wa rho Osanobua mwa wa ne agbọn ẹvbo hia.

⁹ Rẹn ọ re ọ gie ima gha rre agbọn, Ọ ma vbe gie ima dele.

¹⁰ Osanobua, wẹ danmwẹ ima ghe nẹ zẹ vbene a kpe esiliva vbe erhẹn erriọ ọ re uwẹ danmwẹ ima ghe.

¹¹ U gie ima dele ye irri, u keghi vbe mu ihẹ ne ọ khua yan ima uhunmwu.

¹² U gie avbe eghian mwa ya owẹ rrilo mwa muotọ; ma la erhẹn kevbe uromwẹ amẹ gberra sokpan, banbanna nian, u viọ ima gha die ehe ne ẹbe i ye.

¹³ I gha viọ ese ne a giẹn uan rriẹ owa ruẹ, I gha viọ emwi ne I ve ye urhu guẹ.

¹⁴ Emwi ne I wẹ I gha viọ rre, vbe ẹghẹ ne I na gha rre ọlọghọmwa, I gha viọ ẹre rre.

¹⁵ I gha mu ohuan rre ne a giẹn ọnrẹn vbe ogiukpo I gha ya ẹmila kevbe ẹwe zọ ese, Ighogho ẹre ghi kpaegbe laghe iso.

¹⁶ Wa danmwehọ wa hia ni ya ọghọ ne Osanobua mẹ gha vbe ta emwi ne ọ ru mẹ ma uwa.

¹⁷ I kpe tie ẹre wẹ ne ọ yọmwẹ obọ, I ye ihuan rho ẹre.

¹⁸ Akpawẹ te I ma zẹ ye ẹmwẹ orukhọ mwẹ, e Nọyaẹnmwa i ghẹ họn erhunmwu mwẹ.

¹⁹ Sokpan Osanobua gele họn ọghomwẹ nẹ, ọ vbe danmwehọ erhunmwu mwẹ.

²⁰ I rho Osanobua, rhunmwuda, ọ ma fieghe uhunmwu ye erhunmwu mwẹ ra ne ọ dobọ aho ẹre ne ẹ i beghe yi ghe mwẹ.