Psalm 65 - Edo Bible (E Baibol Ẹdo) Version 1996

Urhomwẹ Kevbe Ekpọnmwẹ

¹ Osanobua, ọ kere ne ima gha rho ruẹ vbe Zaiọn ne ima gha mu eyan ne ima yan ma ruẹn sẹ.

² Rhunmwuda ne u na họn erhunmwu, emwa hia gha ke ehe hia bu ruẹ rre, rhunmwuda orukhọ iran.

³ Abakuru mwa munọ ima gbotọ, sokpan, wẹ keghi ya iran bọ mwa.

⁴ Afiangbe ọrọre ọghe iran ne uwẹ hannọ zẹ, ne uwẹ vbe viọ gha dee do di owa ruẹ ne ọ huanrẹn ya emwi esiesi ni rre owa ruẹ gha sẹ ima ọkẹn, afiangbe ọghe Ọgua Osa ne ọ huanrẹn ruẹn.

⁵ Wẹ rhie ewanniẹn ma vbekpa ne u na gie ima khọnmiotọ u keghi winna iwinna ọyunnuan nibun ya miẹn ima fan. Emwa ni rre otọ agbọn hia kevbe iyeke avbe okun ni rrei mu ẹtin yan ruẹn.

⁶ Ẹtin ruẹn ọ re u ya munọ avbe oke ye ihe iran, u keghi rhie iwegbe ruẹ nọkhua maa.

⁷ U dọ uhumwẹ avbe okun yọ, deba owogho avbe ubimwẹ amẹ u vbe dọ owogho avbe emwa nii yọ.

⁸ Otagbọn hia mudia yan unu uan gha ghe iwinna nọkhua ne uwẹ winnaẹn. Iwinna ruẹn rhie uwemwẹ oghọghọ rre, ke ufomwẹ agbọn ọkpa ya sẹ nọkpa.

⁹ U rhie maa vbene u gbe aro ghe otọe hẹ, vbene u na gie amẹ gha rhọ yọ u keghi ya ẹe gha maa ọ na vbe gha maa emwiokọ erriọ ọ re u ru ẹe.

¹⁰ U gie amẹ kakabọ rhọ ye ugbo ne a gua nẹ u kevbe gbe amẹ ya guagua ẹe ne ọ rọkhọ. U rhọ amẹ ye otọe nii ne ọ gha khuẹrhẹ u na vbe ru ẹe ne ivbi erhan zọ vbọ.

¹¹ U miẹn vbe emwiokọ ne iruẹmwi ẹse ruẹ rhie ne emwa bun hẹ! Ọkpọkua ghi gha rre ehe ne u la ẹe hia.

¹² Emwirri vuọn oha ne aranmwẹ na rria ọghuẹ oghọghọ vuọn ọkpẹn avbe oke nii hia.

¹³ Uwu ogba vuọn ne avbe ohuan avbe uye keghi vuọn ne ọka emwi hia gha datu iran vbe so ihuan oghọghọ.