Psalm 64 - Edo Bible (E Baibol Ẹdo) Version 1996

Erhunmwu A Degue Ọmwa

¹ Osanobua, họn erhunmwu mwẹ, rhunmwuda mẹ rre uwu ọlọghọmwa ohan avbe eghian mwẹ mu mwẹ miẹn orhiọn mwẹ fan.

² Miẹn mwẹ fan vbe obọ iro dan avbe emwa dan kevbe hin obọ otu ọkhọ.

³ Iran lọ aranmwẹ iran zẹvbe umozo iran kegha ya ẹmwẹ ọkhọ kọn ọmwa zẹvbe ifẹnmwẹ.

⁴ Obọ wa kẹ iran vbe ohoghe ifavbaro iran ne iran vẹvẹ. Iran ya ọtakhọ ọyẹvbu iran fuẹn emwa esi ua.

⁵ Iran ghi gha yi egbe ike vbe uma dan ne iran si, iran ghi gha si uma ehe ne iran gha rhuẹ ifi iran yi. Iran ghi gha kha wẹẹ, “Ọmwarhọkpa i miẹn iran.”

⁶ Iran gha si uma dan nẹ iran ghi kha wẹẹ, “Iba ne ọ defiọ fo, ọ re ima wa mwamwa ye otọ na.” Ọkpaodin ọ re ekhọe kevbe orhiọn ọmwa nagbọn khin.

⁷ Sokpan, Osanobua ghi fi ifẹnmwẹ ọnrẹn gie iran, emwi ghi vba iran vbe udomwurri.

⁸ Ọ gha fuẹn iran an rhunmwuda avbe ẹmwẹ ne iran ta nii, emwa ni miẹn iran hia ghi gha fieghe uhunmwu.

⁹ Ohan gha mu iran hia iran ghi gha mu iwinna Osanobua roro iran ghi vbe gha na iyẹn emwi ne ọ ru.

¹⁰ Emwa ẹmwata hia gha ghọghọ ye iwinna ne Nọyaẹnmwa winna ẹn. Iran gha ya lẹgbinna ẹẹn, avbe ẹmwata hia gha rho ẹre vbe uyi.