Psalm 63 - Edo Bible (E Baibol Ẹdo) Version 1996

A Ya Ekhọe Gualo Osanobua

¹ Osanobua, wẹ ọrọre Osanobua mwẹ ekhọe mwẹ vbe gualọ ọ. Egbe mwẹ hia wa gualọ ọ zẹvbe otọe ne ọ kae ne ọ fafaa kevbe zẹvbe otọ ne amẹ i ye ohanmwẹ amẹ ruẹn gbe ekhọe mwẹ.

² Gun mwẹ bẹghe ruẹ vbe uwu owa ne ọ huanrẹn nii, gun mwẹ bẹghe vbene u mwẹ ẹtin kevbe uyi hẹ.

³ Aho ruẹ ne ẹ i beghe maa sẹ arrọọ tobọre rhunmwuda ọnii mẹ gha rho ruẹ.

⁴ I gha rhie ekpọnmwẹ nuẹn vbe ẹghẹ ne I gha tọn obọ mwẹ mu na erhunmwu ghe ruẹ.

⁵ Orhiọn mwẹ gha rri evbare ẹko ghi vbe vuọẹn I gha so ihuan urhomwẹ oghọghọ ghe ruẹ.

⁶ I gha lovbiẹ vbe ukpo mwẹ, I ghi gha mu ẹmwẹ ruẹn ro vbe asọn hia.

⁷ Rhunmwuda, we ọ re ọ yọmwẹ obọ vbe ẹghẹ hia vbe ototọ aghọnghọn ifuẹn ruẹn ọ re I na so ihuan oghọghọ.

⁸ I sikan mu uwẹ obọ ruẹ keghi rhie mwẹ lẹre vbe a i mwẹ ẹbe.

⁹ Iran ni ho ne iran gbe mwẹ uan gha tuorre fi agbọn iran ni wulo nẹ.

¹⁰ A gha gbele iran vbe okuo oduma ghi rri ikun iran.

¹¹ Ọba gha ghọghọ rhunmwuda Osanobua gie ẹe khọnmiotọ, iran ni ya eni Osanobua yan eyan gha rho ẹre sokpan a gha gue avbe ọhọn ohoghe unu.