Psalm 62 - Edo Bible (E Baibol Ẹdo) Version 1996

A Mu Ẹtin Yan Ugue Osanobua

¹ I hẹko ya izin egbe mudia khẹ Osanobua ne ọ do miẹn mwẹ fan. Rẹn okpa kẹkan ọre I mu ẹtin yan.

² Rẹn okpa kẹkan ọre ọ degue mwẹ ọ vbe miẹn mwẹ fan obọ ọmwa i ra gba mwẹ ẹdẹdẹmwẹdẹ.

³ Inu ẹghẹ ọre uwa na hia ra ya gha gun orhunmwu okpa kẹkan khọn yi ọmwa ne ọ ma ghi wegbe sẹ ogha ne ọ guọghọ gbotọ nẹ?

⁴ Te uwa ho ne uwa siẹe guọ, hin ehe uyi ẹre rre kẹkan; ohoghe ne a ta ghi wa gha yẹ uwa wa ghi gha na erhunmwu, vberriọ, wa ye otọ ẹko tie ihẹn ne ẹn.

⁵ Osanobua okpa ọ re I ya egbe yan idaehọ mwẹ vbe rre ọghọe.

⁶ Rẹn okpa kẹkan ọ re ọ degue mwẹ ne ọ vbe miẹn mwẹ fan obọ ọmwa i ra gha mwẹ ẹdẹdẹmwẹdẹ.

⁷ Osanobua ọ re imiẹnfan mwẹ kevbe uyi mwẹ hẹnhẹn egbe yan; rẹn ọrọre ugue mwẹ ne ọ wegbe, rẹn ọrọre ehe ne I lẹre yi.

⁸ Wa ne emwa mwẹ, wa mu ẹtin yan Osanobua vbe ẹghẹ hia, wa ta enegbe uwa hia ma rẹn, rhunmwuda rẹn ọrọre ugue ne ima.

⁹ Te emwa yevbe uhiọnrọnmwẹ ihue, ke ne ọ kpọlọ kevbe ne ọ kanmwa, kẹkan ehia khin. Mu iran ye omwa iran i si uwan rhọkpa iran hogha sẹ uhiọnrọnmwẹ kẹkan.

¹⁰ Ghẹ mu ẹtin yan uyimwẹ ika ghẹ rhie aro ye ere vbe oyi ne a rha, a deghẹ ẹfe ruẹ vbe muan yọ, ghẹ mu ẹtin yan rẹn.

¹¹ Ọ gberra uhukpa ne I he họn ẹn vbe Osanobua khare wẹ rẹn ọ re ọ yan ẹtin.

¹² Kevbe wẹ aho irẹn i beghe. Nọyaẹnmwa, wẹ ọ re ọ tobọruẹ hae ne dọmwadẹ ọghọe vbene iwinna rẹn khare.