Psalm 60 - Edo Bible (E Baibol Ẹdo) Version 1996

Erhunmwu A Miẹnfan

¹ Osanobua, wẹ he ima nẹ, obọ ruẹ keghi vbe gba ima. U wa mobọ mu ohu ghe mwa sokpan, eban nian werriegbe bu ima rre.

² U mu otọe nii rueghe, u keghi vbe fian uvun gbodo yọ. Banbanna nian kpe ẹwẹn ọnrẹn rriẹ rhunmwuda te ọ ghi ra zagha a.

³ U gie avbe emwa ruẹn rrioya ẹsẹsẹmwẹse; te ima ghi ye owẹ ba otọ ku khian vbe ọmwa ne ayọn gbe.

⁴ U bu iran ni ye ọghọ ne uẹn ude ne iran miẹn ehe na fe vbe obọ a bu ohiẹn gbe ọmwa.

⁵ Ya ẹtin ruẹn miẹn mwa fan, họn erhunmwu mwa ne a miẹn ehe na dẹ emwa ne u ho ẹmwẹ ọnrẹn werriegbe.

⁶ Osanobua guan ke uwu ehe ne ọ huanrẹn ọghọe rre wẹẹ, “Vbe uwu akhọnmiotọ I gha ghae Siẹkẹm I gha vbe ghae Iya e Sukọt ne iran ne emwa mwẹ.

⁷ Ọghomwẹ ọre Giliad khin, kevbe Manasẹ ba ẹre. Ifreim ọrọre ẹrhu mwẹ, e Juda ọrọre ọkpọ ọba mwẹ.

⁸ Sokpan I gha ye Moab ru uwawa akhuẹ mwẹ I gha vbe bannọ ibata mwẹ yan Idọm ne I ya rhie ma ighe mẹ ọ re ọ yan rẹn. Te avbe Filistin ro ighe iran gha we uwemwẹ akhọnmiotọ yan mwẹ ra?”

⁹ Osanobua de ọmwa ne ọ gha rhie mwẹ gha rriẹ ẹvbo ne a gbe odin ga nii? De ọmwa ne ọ gha ma mwẹ odẹ gha rriẹ Idọm?

¹⁰ Te u gele wa he ima ye otọ ra? Wẹ i ghi ra lele iyokuo mwa ladian ra?

¹¹ Yi ima obọ gu avbe eghian ni gbinna; kẹkan ọ re iyobọ ọmwa nagbọn khin.

¹² Osanobua deba mwa, ma gha khọnmiotọ rẹn gha khọn avbe eghian mwa.