Psalm 6 - Edo Bible (E Baibol Ẹdo) Version 1996

Erhunmwu Vbe Ẹghẹ Olọghọ

¹ E Nọyaẹnmwa, ghẹ gun mwẹ gui, vbe ohu mu ẹẹn, ghẹ rrio mwẹ oya vbe izohu ruẹ,

² Egbe wọ mwẹ nẹ Nọyaẹnmwa, tohan mwẹ! Rhie orhiọn yọmwẹ iwu, rhunmwuda ẹtin fo mwẹ nẹ fẹfẹẹfẹ.

³ Egbe ma rọkhọ mwẹ hiehie, vbua gha kpẹẹ sẹhẹ yi, Nọyaẹnmwa, u ke do yọmwẹ obọ?

⁴ Gha de do miẹn mwẹ fan, Nọyaẹnmwa wọlọ mwẹ hin obọ uwu rre, rhunmwuda itohan ruẹn.

⁵ A i ye ruẹ rre vbe ẹvbo iran ni wulo nẹ, ọmwa rhọkpa i sẹtin rho ruẹ vbe evba.

⁶ Akhiẹ dunmwu mwẹ uan nẹ, asọn asọn ọ re ukpo mwẹ ya lẹ amẹ, ameve keghi ro ye ukohunmwu mwẹ.

⁷ I i ghi bẹghe odẹ ẹse, rhunmwuda eve ne eghian mwẹ zẹ yọ mwẹ egbe, te aro mwẹ hia ghi hinmwian.

⁸ Wa kpao vbe ehe ni I ye rre, emwa dan, E Nọyaẹnmwa họn eve mwẹ nẹ.

⁹ Ọ danmwehọ eve ne I viọ nọ iyobọ, ọ gha vbe họn erhunmwu mwẹ.

¹⁰ Efaa ọmwa ne a mu gbotọ, gha rruan avbe eghian mwẹ. Iran gha lẹ ulẹ ọbanban gha rriẹ.