Psalm 59 - Edo Bible (E Baibol Ẹdo) Version 1996

Erhunmwu A Fe Vbe Ẹbe

¹ Osanobua mwẹ miẹn mwẹ fan vbe obọ avbe eghian mwẹ degue mwẹ hin obọ iran ni gunmwẹ gbinna.

² Miẹn mwẹ fan vbe obọ avbe emwa dan nii, yuo mwẹ hin obọ avbe izigha nii rre!

³ Ghe! Iran ghae ye odẹ ne iran gbe mwẹ uan. Avbe emwa dan gha si uma ga mwẹ, ẹ i re rhunmwuda orukhọ, ra abakuru ne I ru.

⁴ Ra rhunmwuda ama ru ẹse mwẹ Nọyaẹnmwa, ne dọmwadẹ ọghọe na khirhi rriẹ ihe ẹre.

⁵ Kpaegbe Nọyaẹnmwa ne Oghodua ne u yọmwẹ obọ to bọọ gie aro ruẹe sẹ ọe Osanobua Izrẹl. Rhiọrre, ne u rri iran ni ma yayi oya ghẹ tohan emwa dan ni ya ọmwa ne a vbokho.

⁶ Iran ghi dọlegbe rre vbe ota iran ghi gha gbọ vbe awa vbe iran a gha la ẹvbo khian.

⁷ Gha họn vbene iran tie ihẹn kevbe vbene iran vbe yanma hẹ. Aranmwẹ iran yevbe umozo vbe unu iran. Sevba te iran ye ro wẹ, ọmwa rhọkpa ma rẹn ne iran ye.

⁸ Sokpan, te uwẹ giẹ iran Nọyaẹnmwa, te uwẹ ya iran ni ma yayi hia gbogiẹ.

⁹ I mu ẹtin yan ẹtin ruẹn Osanobua, wẹ ọrọre ugue mwẹ.

¹⁰ Osanobua mwẹ ho ẹmwẹ mwẹ, ọ gha rrọ mwẹ rre, ọ gha gun mwẹ miẹn iyeke avbe eghian mwẹ.

¹¹ Ghẹ gbele iran an Osanobua, ne avbe emwa mwẹ ghẹ ya mianmian, ya ẹtin ruẹn zagha iran an ne u khọn iran mutan, Nọyaẹnmwa ugue mwa.

¹² Orukhọ rre aranmwẹ iran, orukhọ ọ re ẹmwẹ ne unu iran hia khin, te ifi itengbemu iran gha mu iran, rhunmwuda ne iran na tie ẹbọ, ne iran na vbe ta ohoghe.

¹³ Fuẹn iran an vbe ohu ruẹ, wa fuẹn iran an fẹẹrẹ, ẹghẹ nii, emwa hia ghi rẹn wẹ Osanobua ọ re ọ khaemwisẹ vbe Izrẹl kevbe wẹ asẹ ọ re gba otọe agbọn hia.

¹⁴ Avbe eghian mwẹ dọlegbe rre vbe ota, iran gha gbọ vbe awa vbene iran la ẹvbo ni khian.

¹⁵ Zevbe awa ni rriarria gualọ evbare khian, ne iran ma miẹn evbare sẹ.

¹⁶ Sokpan, mẹ gha so ihuan ẹtin ruẹn. Owiẹ owiẹ, ọ re imẹ gha ya kakabọ so ihuan ahoẹmwọmwa ruẹn ne ẹ i beghe. Wẹ ọrọre ugue ne ọ degue mwẹ ehe ne I lẹre yi vbe ẹghẹ ibaro.

¹⁷ I gha rho ruẹ wẹ ne ọ gbinna mẹ. Osanobua ọrọre ugue mwẹ, Osanobua nii, ne ọ ho ẹmwẹ mwẹ.