Psalm 58 - Edo Bible (E Baibol Ẹdo) Version 1996

Erhunmwu Wẹ Ne Osanobua Rri Ọmwadan Oya

¹ Wa gele zẹdia bu ohiẹn ẹmwata ra wa ni rre asẹ? Wa ye abọkpa bu ohiẹn emwa hia ra?

² Hiehiere! Emwi dan ne uwa ra ru ọkpa, ọ re uwa zẹ iro ẹre, wa ghi vbe gha ru orukhọ ekhọe dan vbe otọe nii.

³ Emwi dan, ọ re avbe emwa dan, wa ya ẹdagbọn iran hia ru. Ẹdẹ ne a biẹ iran, ọ re iran ke ta ohoghe.

⁴ Iran vuọn ne obi zẹ vbe ẹyẹn iran ghi khiọ ehọ iran vbe ẹyẹn ne ọ yin ehọ.

⁵ Ne ẹ i họn vbe ọmwa ne ọ ta ẹyẹn ohun, a gha ta ẹre ohun. Ra ẹmwẹ unu ọghe ọbo edunna ne ọ guẹe fo.

⁶ Guọghọ akọn avbe oduma ni khọ na, Osanobua.

⁷ Te a gha ho iran bẹkun vbe amẹ ne ọ lẹ kua. Te iran gha guọghọ ua vbe irunmwu ne ọ rre adesẹ odẹ.

⁸ Te iran gha ya yevbe egilẹ nọ rọn uan, vbe ọkpan odo. Te iran gha yevbe ọmọ ne ọ kpa ẹn fua ne okpa ma gbe ifuẹn na.

⁹ Vbe iran te rẹn, te a gha gbẹn iran kua vbe irunmwu. Osanobua gha hoho iran kua vbe ohu ẹre ne ọ wegbe, vbe iran ma he wulo.

¹⁰ Ẹko gha rhiẹnrhiẹn ẹmwata, vbe iran a miẹn wẹ a rri emwa dan oya, iran gha tubu la esagiẹn emwa dan gberra.

¹¹ Emwa ghi gha kha wẹẹ, “A gele san emwa esi ẹse vbẹmwata; Osanobua ne ọ bu ohiẹn agbọn na gele rrọọ.”