Psalm 57 - Edo Bible (E Baibol Ẹdo) Version 1996

Erhunmwu Iyobọ

¹ Tohan mwẹ Osanobua tohan mwẹ, rhunmwuda wẹ ọ re imẹ lẹgbinna aghọnghọn ifuẹn ruẹn ọ re imẹ lẹre yi rhinrin okpẹhoho na te do la fo.

² I kpe tie Osanobua Ne ọ yo sẹẹ Ehia, Osanobua ne ọ viọ emwi hia ne imẹ.

³ Rẹn gha wanniẹn ke ẹrinmwi rre ọ ghi miẹn mwẹ fan, ọ gha khọn iran ni kpokpo mwẹ muotọ. Osanobua gha rhie aho ẹre ne ẹ i beghe, kevbe aguobọmwa ma mwẹ.

⁴ Eghian ni yevbe oduma ni rri ọmwa lẹga mwẹ. Akọn iran yevbe asoro kevbe ifẹnmwẹ, aranmwẹ iran yevbe umozo ne ọ mu.

⁵ Osanobua, rhie ukpọlọmwẹ ruẹn ma vbe iso kevbe uyi ruẹ yan otọ agbọn hia.

⁶ Avbe eghian mwẹ rhuẹ ọga yotọ ne iran mu mwẹ, akhiẹ gbe mwẹ fi otọ iran tọn uye ye odẹ ne I la, sokpan, iran tobọ iran kharha yọ.

⁷ Mẹ mwẹ a mu ẹtin yan fẹfẹẹfẹ, Osanobua I gha so ihuan I gha vbe rho ruẹ.

⁸ Rhiọrre wẹ ne orhiọn mwẹ wa rhiọrre, ukusẹ kevbe akpata, I gha huẹn owẹn vbe ovbe.

⁹ I gha kpọnmwẹ ọn vbe uwu agbọn ẹvbo, Nọyaẹnmwa, I gha rho ruẹ vbe uwu ẹbu avbe emwa.

¹⁰ Iho ruẹ ne ẹ i beghe sẹ ẹrinmwi, aguobọmwa ọwuẹ sẹ iso.

¹¹ Rhie ukpọlọmwẹ ruẹn maa vbe iso, Osanobua kevbe uyi ruẹ yan otọ agbọn hia.