Psalm 56 - Edo Bible (E Baibol Ẹdo) Version 1996

Erhunmwu A Mu Ẹtin Yan Osanobua

¹ Osanobua tohan mwẹ rhunmwuda, emwa wa gunmwẹ gbinna, avbe eghian mwẹ wa zẹ mwẹ kpokpo vbe ẹghẹ hia.

² Iran ni mu aro igbinna da mwẹ wa gunmwẹ khọn ne ebi ro. Iran ni gunmwẹ khọn wa bun ẹsẹse.

³ E Nọyaẹnmwa ne Oghodua ohan gha mu mwẹ I mu ẹtin yan ruẹn.

⁴ Mẹ mu ẹtin yan Osanobua ohan ighi mu mwẹ. Mẹ rho ẹre, rhunmwuda eyan ne irẹn yan rẹn, demwi ne ọmwa kẹkan gha sẹtin ru mwẹ re.

⁵ Avbe eghian ghi ho mwẹ ẹmwẹ ne ebi ro, ẹghẹ hia ọ re iran ya zẹ iro, ọghe vbene iran gha ya kuan mwẹ hẹ.

⁶ Iran ghi ya si koko ye ẹkhokho, iran ghi gha baba emwi ne I ru hia, vbe idaehọ wẹ, ne iran gbe mwẹ uan.

⁷ Osanobua, rri iran oya ye emwi dan ne iran ru, vbe izohu ruẹ, gie obọ ruẹ ke ukhunmwu ne iran!

⁸ Wẹ rẹn vbene obọ orueghe da mwẹ sẹ hẹ, wẹ gbẹnnẹ ẹmwẹ ameve mwẹ ye otọ nẹ, a ma mwamwa iran ye otọ vbe ẹbe ruẹ ra?

⁹ Ẹdẹ ne I gha kpe tie ruẹ avbe eghian mwẹ gha lẹ werriegbe mẹ rẹn ọnọna wẹ, mẹ ọ re Osanobua ya ba,

¹⁰ e Nọyaẹnmwa ni ne imẹ go wan eyan rẹn.

¹¹ Rẹn ọ re I mu ẹtin yan ohan i ra mu mwẹ de emwi ne ọmwa kẹkan gha sẹtin ru mwẹ re?

¹² Osanobua mẹ gha ha emwi ne imẹ ve ne uẹn mẹ gha viọ emwi imuohan ọghe ekpọnmwẹ mwẹ nuẹn.

¹³ Rhunmwuda u wọlọ mwẹ ladian vbe uwu uwu u ma gie obọ gba mwẹ rhunmwuda ọnii ọ re imẹ na khian vbe odaro Osanobua vbe uwu uwanmwẹ ne ọ wan mu emwa ni rre agbọn.