Psalm 55 - Edo Bible (E Baibol Ẹdo) Version 1996

Erhunmwu Ọmwa Ne Ọse Ya Ne Vbokho

¹ Họn erhunmwu mwẹ Nọyaẹnmwa, ghẹ fi aro ua vbe i a gha rinmwian.

² Danmwehọ mwẹ ne u rhie ewanniẹn mẹ, ohawa ne I ye wiẹn mwẹ uan.

³ Eyan ne avbe eghian mwẹ yan mu mwẹ ohan, ukpokpo emwa dan rẹnkhẹn mwẹ ye otọ iran si ọlọghọmwa yọmwẹ egbe, ohu mwẹ mu iran iran vbe khuiwu mwẹ.

⁴ I runraẹn ẹsẹse, ohan uwu vbe rẹnkhẹn mwẹ ye otọ.

⁵ Ohan kevbe uguọmwẹ dobọ mu mwẹ, ohan ọyunnuan mu mwẹ guẹ.

⁶ Akpawẹ te imẹ mwẹ ifuẹn zẹvbe idu, te I gha tin fua, ne I ya gualọ ihọkpa na kẹtin.

⁷ Te I gha wa kakabọ tin rrei, ne I ya bọ owa mwẹ ye uwu ato.

⁸ Te I gha zẹgiẹgiẹ kpao, ne I ya gualọ ehe ne a lẹre yi ne egbe mwẹ hin ogbigbi ẹhoho kevbe ẹhoho amẹ.

⁹ Gie iran ne eghian mwẹ zurọ ua vbe iran a gha guan, I miẹn uyimwẹ ne ọ wegbe kevbe otighi vbe ẹvbo nii.

¹⁰ Ọ lẹga ẹre vbe avan kevbe asọn, ọ ya uyinmwẹ ika kevbe orueghe vuọn rẹn.

¹¹ Omurhia wa rre ehe hia, ore ẹre hia vuọn ne ukpokpo kevbe orhure.

¹² Akpawẹ oghian ọ re ọ ya mwẹ gbogiẹ, te I gha zin ẹnrẹn, akpawẹ ọmwa ne a gba suan ọ re ọ rhuọ gunmwẹ, te I gha rhie egbe mwẹ lẹre ne ẹẹn.

¹³ Sokpan, wẹ nọ, ogieva mwẹ, ihua mwẹ kevbe osẹ ne ọ sikẹ mwẹ.

¹⁴ Ma gba mu iro ẹkhokho ma egbe, ma keghi vbe gba ga vbe uwu Ọgua Osa.

¹⁵ Te avbe eghian mwẹ gha fian wu; te iran gha ye owẹ khian la ẹvbo emwa ni wulo nẹ. Ọkhọ rre owa iran kevbe ekhọe iran.

¹⁶ Sokpan, mẹ kpe tie Nọyaẹnmwa Osanobua ne ọ yọmwẹ obọ, ọ gha miẹn mwẹ fan.

¹⁷ Owiẹ, avan kevbe asọn ọ re ovian kevbe utumwẹ obalọ mwẹ ya bu ẹre yo, ọ gha họn urhu mwẹ.

¹⁸ Ọ gha rhie mwẹ ke okuo ne I gu eghian nibun khọn gha die owa vbe egbe hẹnnẹdẹn.

¹⁹ Osanobua ne ọ khaemwisẹ, ke ne a bu agbọn tuagbọn gha dee, gha họn urhu mwẹ, ọ ghi khọn iran muotọ rhunmwuda, iran ma kue ne iran fiwerriẹ iran i vbe mu ohan rẹn.

²⁰ Ọmwa ne ima gba mu obọ nẹdẹ gu avbe esiọre gbinna ọ ma mu eyan irẹn sẹ.

²¹ Ẹmwẹ unu ẹnrẹn rriẹ sẹ owọn, sokpan ohu ọmwa mu ọmwa rre ọre uwu ekhọe, ẹmwẹ unu ẹnrẹn rọkhọ emwi sẹ ofigbọn, sokpan, te ọ giagia emwi vbe umozo ne ọ mu.

²² Zẹ ọlọghọmwa ruẹn obọ ne Nọyaẹnmwa, rẹn gha gbinna ne uẹn, ẹ i kue ne a mu ọmwa esi gbotọ

²³ Sokpan, Osanobua, wẹ ọ ra silo avbe izigha kevbe avbe ọhọn ohoghe la idin iran ọ te sẹ ukhiọnmwẹ ẹdẹ agbọn iran. Sokpan, zẹ vbe ọghomwẹ mẹ gha mu ẹtin yan ruẹn.