Psalm 52 - Edo Bible (E Baibol Ẹdo) Version 1996

Ibuohiẹn Kevbe Ẹsọhẹ Osanobua

¹ Okpọmwa, vbọzẹ ne u na ya emwi dan rhuọ yi? Aho ẹmwẹ ọmwa Osanobua; etẹbitẹ nọ.

² U zẹ iro vbene u gha mu agbọn rhia ye ẹrrẹe obọ hẹ aranmwẹ ruẹn yevbe abẹe ne ọ mu, ẹghẹ hia ọ re u ya zẹ ohoghe ta.

³ U ho ẹmwẹ emwi dan sẹẹ emwi esi, kevbe ohoghe sẹẹ ẹmwata.

⁴ Wẹ ne ọhọn ohoghe ẹko wa rhiẹnrhiẹn ọn ye ẹmwẹ ne a mu tọn ọmwa.

⁵ Rhunmwuda ọnii, Osanobua gha mu uwẹ rhia ẹdẹdẹmwẹdẹ, ọ gha dobọ mu ẹẹn ọ ghi sanmwọ ọn hin owa ruẹ rre ọ ghi rhie ruẹ hin agbọn emwa ni ma he wu rre.

⁶ Emwa ẹmwata gha miẹn ọna; ohan ghi mu iran iran ghi gha giọọ, iran ghi kha wẹẹ,

⁷ “Wa ghe ẹre ighẹ okpia ne ọ ma lẹ gbinna Osanobua, sokpan ọ keghi mu ẹtin yan ẹfe ẹre nibun. Ọ na wẹ uyinmwẹ dan rẹn ra ya gbe ẹkun sẹ otọ.”

⁸ Sokpan, mẹ yevbe erhan oliv, ne ọ wan ladian vbe owa Osanobua ahoẹmwọmwa rẹn ne ẹ i beghe ọ re imẹ mu ẹtin yan ẹdẹ kevbe ẹdẹdẹmwẹdẹ.

⁹ Osanobua, te imẹ ra gha kpọnmwẹ ọn khian rhinrin, rhunmwuda, iwinna ne u winnaẹn; vbe uwu ẹbu emwa ruẹn. Ọ re I ra na tae wẹ, ọmwa ne ọ maa ọ re uwẹ khin.