Psalm 51 - Edo Bible (E Baibol Ẹdo) Version 1996

Erhunmwu Iyabọ

¹ Tohan mwẹ Osanobua rhunmwuda ahoẹmwọmwa ruẹn ne ẹ i beghe rhunmwuda itohan ruẹn ne ọ kpolo khiẹn orukhọ mwẹ nibun hin rre.

² Khuẹ emwi dan mwẹ hia kua ne u vbe khuẹ mwẹ huan hin orukhọ mwẹ rre.

³ Mẹ miẹn abakuru mwẹ hia kue; ẹghẹ hia ọ re I ya mu ẹmwẹ orukhọ mwẹ ro.

⁴ I rukhọ ghe ruẹ nẹ, wẹ ọkpa ọ re I rukhọ ọ ghe I keghi vbe ru emwi ne uwẹ ka ye orukhọ. Rhunmwuda ọnii, u rriase vbe u bu ohiẹn mwẹ emwi ne ọ kere ọ re u ru; vbe u bu abe gbe mwẹ.

⁵ Emwi dan ọ re I wa khin, kevbe ne a ya biẹ mwẹ gha dee, I keghi wa vuọn ne orukhọ ke ẹdẹ ne a biẹ mwẹ kpao.

⁶ Ekhọe ne ọ diae kevbe ẹmwata; ọ re uwẹ ho, ya ẹwaẹn ruẹn vuọn ekhọe mwẹ.

⁷ Khiẹn orukhọ mwẹ hin rre mẹ gha huan, khuẹ mwẹ mẹ gha fua sẹẹ isonorhọ.

⁸ Gunmwẹ họn urhu oghọghọ kevbe ọyẹnmwẹ a gha rhe miẹn ighẹ u lọkọ mwẹ u vbe rẹnkhẹn mwẹ uan nẹ, ẹko mwẹ gha ye dọlegbe rhiẹnrhiẹn.

⁹ Rhie aro hin orukhọ mwẹ rre, ne u vbe khiẹn emwi dan mwẹ hia hin rre.

¹⁰ Yi orhiọn ne ọ huanrẹn ye uwu imẹ Osanobua, ne u vbe mu ekhọe ọgbọn ne ọ guobọ ruẹ ye uwu imẹ.

¹¹ Ghẹ kan mwẹ fua hin ehe ne u ye rre ghẹ vbe miẹn mwẹ orhiọn ne ọ huanrẹn ruẹn.

¹² Rhie oghọghọ imiẹnfan ruẹn dọlegbe mẹ, ne u gunmwẹ gha ho ne I gha họn ẹmwẹ ne uẹn.

¹³ Ẹghẹ nii; mẹ gha ma avbe emwa orukhọ uhi ruẹ, iran ghi dọlegbe bu ruẹ gha dee.

¹⁴ Fi mwẹ yi Nọyaẹnmwa, ne u miẹn mwẹ fan, mẹ gha ya oghọghọ na iyẹn ẹmwata ruẹ.

¹⁵ Yọmwẹ obọ ne I guan Nọyaẹnmwa, mẹ gha vbe gha rho ruẹ.

¹⁶ Wẹ i gualọ ese, te I gha te zọ ghe ruẹ. Ẹko ruẹ i vbe rhiẹnrhiẹn ye ese ne a giẹn uan.

¹⁷ Izọese mwẹ, ọrọre ekhọe ne ọ mu egbe rriotọ Osanobua, wẹ i ra he ekhọe ne ọ mu egbe rriotọ, kevbe ne ọ roiro fi uyimwẹ werriẹ.

¹⁸ Osanobua, tohan e Zaiọn ne u yi ọre obọ, dọlegbe gbe ekẹn Jerusalẹm.

¹⁹ Ẹkpo nii, ẹko gha rhiẹnrhiẹn ọn ye ese ẹmwata. Ma gha vbe zọ ese ne a giẹn uan kevbe ese ekhuia ẹmila; vbe Ogiukpo ruẹ.