Psalm 50 - Edo Bible (E Baibol Ẹdo) Version 1996

Ugamwẹ Ẹmwata

¹ Osa ne Oghodua e Nọyaẹnmwa, guan rẹn ọ da tie otọ agbọn ke ahọ yasẹ orrie.

² E Nọyaẹnmwa wan uwanmwẹ, ke Zaiọn rre, ẹvbo nii ne osẹ gba na fo.

³ Osanobua mwa dee sokpan, ẹ i ra do rre okperhẹn ne ọ giẹn emwi hia rre odaro ẹre okpẹhoho ne ọ dunmwu emwi hia lẹga ẹre.

⁴ Ọ tie ẹrinmwi kevbe agbọn ye osẹe, ne iran do ghe vbe irẹn a gha bu ohiẹn emwa irẹn.

⁵ Rẹn keghi kha wẹẹ, “Wa si avbe emwa ni guobọ mwẹ koko ye ehe ne I ye, iran ni zọ ese ya gun mwẹ ta ile.”

⁶ Ẹrinmwi ya ẹe go wẹ, ọmwata ọ re Osanobua khin wẹ rẹn tobọ ẹre ọrọre nọbuohiẹn.

⁷ “Wa danmwehọ, wa ne emwa mwẹ I gha guan, I gha sẹ osẹ gbe uwa Izrẹl, mẹ ọrọre Osanobua Osanobua uwa.

⁸ I ma gu uwa gui ba ẹmwẹ ese uwa ra ese ne a giẹn uan ne uwa viọ gunmwẹ.

⁹ Sevba, I ma nọ uwa ẹmila ne ugbo uwa ra ẹwe vbe oghẹn emwirri rua;

¹⁰ aranmwẹ hia ni rre oha, mẹ ọ yan iran kevbe avbe ẹmila ni rre oke arriaisẹn.

¹¹ Ahianmwẹ ni rre oha hia, mẹ ọ re ọ yan iran, deba emwi hia ni ghi rre oha hia.

¹² “Deghẹ ohanmwẹ gbe mwẹ, mẹ i vbe tama uwa. Rhunmwuda, agbọn kevbe emwi ni rre uwu ẹre hia mẹ ọ re ọ yan iran.

¹³ Mẹ gha rri emiowo ẹmila ra? Ra ne I wọn esagiẹn ẹwe?

¹⁴ Ya ẹse ne a kpọnmwẹ gha ru ese ne u zọ ghe Osanobua ne u vbe viọ emwi ne u ve hia ne Udazi.

¹⁵ Ibaro gha rre, kpe tie mwẹ, I gha miẹn ruẹn fan wẹ ghi do gha rho mwẹ.”

¹⁶ Sokpan, Osanobua tama emwa dan wẹẹ, “Vbọzẹ ne u wa na guan kan ile mwẹ?

¹⁷ Wa wẹ wa i kue ne I dia uwa, wa he iyi mwẹ ye otọ.

¹⁸ Wa khian osẹ oyi ne uwa a rhirhi miẹn hia wẹ vbe iran ni ghẹẹ ọ re ọ gba mu obọ.

¹⁹ “Ẹghẹ hia wa ya mu egbe ne uwa ya ta ẹmwẹ dan ohoghe ne a ta i vbe kan uwa aro.

²⁰ Wa mu egbe ne uwa ya ba ọtẹn uwa ifi ẹzọ, ne uwa vbe gha ya ẹmwẹ ho iran.

²¹ Wa ru avbe emwi na hia mẹ keghi hunwan kpọi wa keghi rhunmwuda ọnii gha ro wẹ, te imẹ yevbe uwa. Banbanna nian mẹ gu uwa gui nẹ I keghi rhan otọ ẹmwẹ nii ma uwa.

²² “Wa danmwehọ ẹmwẹ na wa ni ma zẹ ye ogho mwẹ ne I ghẹ fuẹn uwa a a i vbe miẹn ọmwa ne ọ gha miẹn uwa fan.

²³ Ekpọnmwẹ ọrọre ese ne ọ rhie ọghọ mẹ, mẹ gha vbe miẹn iran hia ni họn ẹmwẹ mẹ fan.”