Psalm 5 - Edo Bible (E Baibol Ẹdo) Version 1996

Erhunmwu A Degue

¹ Rhie ehọ ye ẹmwẹ mwẹ Nọyaẹnmwa, ne u vbe họn ikhiẹkhiegbe mwẹ,

² Danmwehọ utumwẹ ne I tu ya nọ iyobọ Osanobua mwẹ kevbe ọba mwẹ! Wẹ ọ re I na erhunmwu ghe Nọyaẹnmwa,

³ U ghi họn urhu mwẹ vbe owiẹwiẹmwọkpa ovẹn gha yan rre, I gha na erhunmwu mwẹ, I ghi mudia khẹ ewanniẹn ruẹn.

⁴ Wẹ i re Osanobua ne ẹko ẹre rhiẹnrhiẹn ye ọkhọ ne a ru wẹ i vbe gie emwi dan gha rre ehe ne uwẹ ye.

⁵ Wẹ i ho ne u bẹghe emwa itengbemu, wẹ khọ ẹko emwa dan hia.

⁶ Wẹ fuẹn avbe ọhọn ohoghe fo fẹẹrẹ, wẹ keghi vbe sọnnọ emwa ibalegbe kevbe emwa erẹrẹ

⁷ Sokpan, rhunmwuda ahoẹmwọmwa ruẹn nọkhua, mẹ gha sẹtin gha die uwu owa ruẹ. I gha sẹtin ga, vbe uwu ọgua Osa ruẹ ne ọ huanrẹn, mẹ ghi vbe ya ọghọ ghughẹrre nuẹn.

⁸ E Nọyaẹnmwa, eghian ne I mwẹ wa bun. Su mwẹ ne I ru iho ruẹ, gie odẹ ruẹ rrie mẹ ne I lele ẹe gha khian.

⁹ A i sẹtin mu ẹtin yan ẹmwẹ ne avbe eghian mwẹ ta. Ne a fuẹn emwi ruan ọre iran ho. Ẹmwẹ iran rhiẹnrhiẹn vbe ehọ, ọ vbe rriẹ. Sokpan, iran vuọn ne erẹrẹ ne ọ si uwu.

¹⁰ Bu abe gbe iran, ne u vbe rri iran oya Osanobua, uma ne iran si ọ re ọ gha gbe iran uhunmwu. Khulo iran hin ehe ne u ye rre, rhunmwuda orukhọ iran nibun kevbe ne iran na sọtẹ ruẹ.

¹¹ Sokpan iran hia ne uwẹ degue gha ghọghọ. Iran gha sẹtin gha so ihuan oghọghọ vbe ẹghẹ hia. Degue iran hia ni ho ẹmwẹ ruẹn; rhunmwuda ruẹ ọ re iran na ghọghọ oghọghọ ẹmwata.

¹² Wẹ ọ re ọ fiangbe iran ni họn ẹmwẹ ruẹn Nọyaẹnmwa. Ahoẹmwọmwa ruẹn ọ re ọ degue iran zẹ vbe asa.