Psalm 49 - Edo Bible (E Baibol Ẹdo) Version 1996

Ukọnmwẹ Ẹfe Ne A Mu Ẹtin Yan

¹ Dọmwadẹ ọghọe, danmwehọ ẹmwẹ na emwa hia ni rre ehe hia wa danmwehọ.

² Ne ọ kpọlọ kevbe ne ọ kanmwa, ọdafẹn kevbe ovbiogue.

³ Iro mwẹ gha dinmwi, I gha guan avbe ẹmwẹ ẹwaẹn.

⁴ I gha mu aro ye ẹmwẹ itan, I ghi vbe gha rhan otọ iran vbe uwu ne I na kpe akpata nii.

⁵ Ohan i mu mwẹ vbe ẹghẹ ẹbe, vbe avbe eghian a lẹga mwẹ.

⁶ Kevbe avbe emwa dan ni mu ẹtin yan ẹfe ne iran na vbe ya ẹfe iran ghagha.

⁷ Ọmwa ọkpa ne ọ gha sẹtin dẹ egbe ẹre werriegbe i rrọọ. Ẹ i sẹtin ha osa ive orhiọn rẹn werriegbe ne Osanobua.

⁸ Rhunmwuda, osa ne a hae ye orhiọn ọmwa nagbọn kpọlọ gbe emwi ne ọ gha sẹtin hae i zẹdẹ sẹ hiehiere.

⁹ Ne ọ gha na wẹ ne ọ ghẹ ghi la idin ne ọ vbe gha rre agbọn ẹdẹdẹmwẹdẹ.

¹⁰ Aro emwa hia sẹ ọe wẹ avbe umẹwaẹn vbe wulo zẹ vbene akpa vbe abobo vbe ye, iran ghi sẹ ẹfe iran rae ne ivbi iran.

¹¹ Idin iran ọrọre owa etẹbitẹ iran, evba iran ra gha ye ẹdẹdẹmwẹdẹ, egbe ne a rhe ya miẹn wẹ, iran ka gha mwẹ otọe obọ iran yi.

¹² U kpọlọ mwẹ ọmwa i sẹtin ya uwu la ọmwa ban te ọ ra ye wu zẹvbe avbe aranmwẹ oha.

¹³ Ghe emwi ne ọ rruan iran ni mu ẹtin yan egbe iran ne a zẹ khẹ iran ne ẹfe ẹre sẹ ọre ọkẹn.

¹⁴ A tae nẹ ighe te iran ra wulo zẹvbe ohuan, uwu, ọ re ọ ra gha re ọsuohuan iran. Obọ ọmwata gha ke ukhunmwu ne iran, vbe ikinnegbe iran a gha kẹkẹ ua ẹgiẹgiẹ, vbe ẹvbo avbe orinmwi, ehe ne ọ rrei ne owa iran ẹsẹse.

¹⁵ Sokpan, Osanobua gha miẹn mwẹ fan ọ gha fan mwẹ yotọ vbe obọ ẹtin uwu.

¹⁶ Ghẹ gie iro han ruẹn vbe ọmwa ọkpa a fe.

¹⁷ Ọ gha wu, ẹi sẹtin kun ẹnrẹn kpao, ẹfe ẹre i ra lele ẹe la idin.

¹⁸ Gie a kha wẹ te agbọn na kue sẹ ọmwa ọkpa ọkẹn a na gha tian rẹn rhunmwuda ighe ọ dunna ne ẹẹn.

¹⁹ Ọ gha vbe ya deba enikaro vbe uwu idin ehe ne ebiebi na so ẹdẹdẹmwẹdẹ.

²⁰ Ukpọlọmwẹ ọmwa i sẹtin ya uwu la ọmwa ban, te ọ ra ye wu zẹ vbe avbe aranmwẹ oha.