Psalm 48 - Edo Bible (E Baibol Ẹdo) Version 1996

E Zaiọn Ne Ẹvbo Osanobua

¹ E Nọyaẹnmwa kpọlọ ne avbe kakabọ rho ọre nọ vbe ẹvbo Osanobua mwa; vbe uhunmwu oke ne ọ huanrẹn ọghọe.

² E Zaiọn ne oke Osanobua oke ne ọ yo kevbe ne ọ mose nọ ẹvbo ọba nọkhua, ne ọ sẹ otọ agbọn hia ọyẹnmwẹ.

³ Osanobua rhiema nẹ wẹ rẹn sẹe ne a lẹ gbinna vbe uwu ehe ne a gbe odin lẹga ọghe ẹvbo nọkhua nii.

⁴ Avbe ọba sii koko iran keghi mu okuo gha die Oke Zaiọn.

⁵ Sokpan, iran ghi bẹghe ẹre udu iran mu waa afianma fian iran iran keghi lẹẹ werriegbe.

⁶ Evba ọ re oguozizi kevbe irriakọn na dobọ mu iran ẹkun. Zẹvbe okhuo ne emwi ubiẹmwẹ ru.

⁷ Zẹvbe okọ ne ogbigbi ẹhoho bi yo bi rre vbe uhunmwu ẹzẹ.

⁸ Ma ka họn emwi ne Osanobua ru nẹ banbanna nian aro mwa sẹ ọe vbe ẹvbo Osanobua mwa. E Nọyaẹnmwa ne Oghodua; ọ gha rhie ẹvbo ni lẹre ẹdẹdẹmwẹdẹ vbe ne ẹi na mwẹ ẹbe.

⁹ Vbe uwu Ọgua Osa Nọyaẹnmwa ma mu ẹmwẹ ahoẹmwọmwa ruẹn ne ẹi beghe ro.

¹⁰ Ehe hia ọ re emwa na rho ruẹ otiti ruẹ vbe gba otọ agbọn hia ẹmwata ọ re u ya khaemwisẹ.

¹¹ Wa gie ẹko iran ni rre Zaiọn gha rhiẹnrhiẹn! Ohiẹn ẹmwata ọ re uwẹ bu, gie ọyẹnmwẹ gha sẹ emwa vbe otọe Juda hia.

¹² Wa ne emwa Osanobua wa khian lẹga e Zaiọn, ne uwa ka inu owa ọkhẹ ni rrọọ.

¹³ Wa gbe aro kotọ ghe ekẹn ne a gbe vbọ ne uwa vbe kakabọ ghe avbe odin ni rrọọ ne uwa miẹn ehe na miẹn iyẹn ọnrẹn na ma orre ne ọ dee wẹẹ,

¹⁴ “Osanobua na Osanobua ima nọ ẹdẹ kevbe ẹdẹdẹmwẹdẹ rẹn ọ re ọ ra gha su ima khian ke orre yasẹ orre.”