Psalm 45 - Edo Bible (E Baibol Ẹdo) Version 1996

Ihuan Irhiọha Ọghe Ọba

¹ Ẹmwẹ ni rhiẹnrhiẹn wa vuọn ekhọe mwẹ, vbe I gbẹn ihuan na ne ọba zẹvbe ukeke ọgbenbe ne ọ guẹe. Aranmwẹ mwẹ, wa mu egbe ekharha ye otọ.

² Wẹ ọ re ọ ghi mose sẹ vbe uwu avbe ikpia hia ọmwa ne ẹmwẹ ma ẹre unu ọre u khin. Te Osanobua wa fiangbe uẹ vbe ẹghẹ hia.

³ Rro umozo ruẹ mu ẹkun, ọba nọkhua, wẹ nẹ ọ vuọn ne osẹ kevbe uyi ọba.

⁴ Gha hin ẹsin khian vbe ọba ne u ya khọnmiotọ, vbe igbinna oseghe ẹmwata, kevbe uhunmwu ẹmwẹ! Ẹtin ruẹn gha viọ akhọnmiotọ nekhua nuẹn!

⁵ Ifẹnmwẹ ruẹn wa mu, iran ha ẹkoko udu eghian ruẹn gberra avbe agbọn ẹvbo ghigha dele ye owẹ ruẹ.

⁶ Arriọba ne Osanobua mu ne uẹn, gha rrọ ẹdẹ kevbe ẹdẹdẹmwẹdẹ, wẹ ghi gha ya ẹmwata rriọba avbe emwa ruẹn.

⁷ Wẹ ho ẹmwẹ emwi ne ọgbae u keghi khuiwu emwi ne ẹ i maa ọnii ọ re ọ siẹe ne Osanobua awẹ Osanobua ruẹ na hannọ uẹn zẹ ọ na ya ọyẹnmwẹ wẹ uẹ sẹẹ avbe ọba nekpa hia.

⁸ Uwinhinmwẹ oziya kevbe alọe rre ukpọn ruẹn; avbe ikpezikẹn ghi gha ku ne uẹn ghe, vbe uwu ẹguae ruẹ ne a ye akọn eni tee.

⁹ Avbe ivbiọba nikhuo rre avbe ikhuo ni rre ẹrriẹ ruẹ amwẹ ọba vbe mudia ye obọ erha ọmwa ẹkete ruẹ, vbe ne ọ na ya emwi itegbe ọghe igoru ne ọ maa sẹẹ han.

¹⁰ Ovbiọha ọba, danmwehọ ẹmwẹ ne I ra tama ruẹn rhie ekhọe hin ẹmwẹ emwa ruẹn kevbe avbe etuẹn rre.

¹¹ Ose ruẹ gha ya ọba ho ẹmwẹ ruẹn, rẹn ọrọre arowa a rhunmwuda ọnii, u ghi gha họn ẹmwẹ ne ẹẹn.

¹² Ivbi e Taia gha ha oko guẹ, emwa nii ni fe ghi gha gualọ aro nọ maa ọwuẹ.

¹³ Ovbi ọba nokhuo rre uwu ẹguae, u miẹn vbene ọ mose hẹ ẹde ne ọ yọe oru igoru ọre a ya do ẹe.

¹⁴ A rhie ẹre gha rriẹ ẹguae kẹe kevbe ẹwu ẹre ne mose mose. Iran ne eguọmwadia ẹre nikhuo vbe lele ẹe a kevbe viọ iran bu ẹre gha dee.

¹⁵ Iran hia keghi la uwu ẹguae ọba vbe oghọghọ kevbe ọyẹnmwẹ.

¹⁶ Wẹ ne ọba mwẹ u gha biẹlẹ emọ ikpia nibun ni gha rri ọba lele avbe erha a odede, wẹ ghi vbe ye iran ru enọkhaemwisẹ, yan uhunmwu otọ agbọn hia.

¹⁷ Ihuan mwẹ gha gie otiti ruẹ gha rrọ rhinrin ẹdẹ emwa hia ghi vbe gha rho ruẹ vbe ẹghẹ hia ẹdẹdẹmwẹdẹ.