Psalm 44 - Edo Bible (E Baibol Ẹdo) Version 1996

Erhunmwu Adegue Ọmwa

¹ Osanobua, ma ye ehọ mwa họn ẹẹn nẹ, avbe erha mwa odede vbe tae ma ima ighe avbe emwi ọyunnuan ne uwẹ ru vbe ẹghẹ iran vbe ẹkpo nẹdẹ.

² Vbene u tobọọ khulo avbe nigẹbọ ladian hẹ u na gbe avbe emwa ruẹn ẹkun sotọ ye otọe iran. vbene u rri avbe agbọn ẹvbo nekpa oya hẹ. u na gie agbọn ma iran ne emwa ruẹn.

³ Ẹ i re umozo iran, ọ re avbe emwa ruẹn ya khọn avbe otọe nii. Ẹ i re ẹtin iran ọ re iran ya khọnmiotọ, ẹtin kevbe iwegbe ruẹ ọre nọ, vbene u na gie iran rẹn ighe u gu iran rrọọ, ne ọ vbe rhie ma ighe u ho ẹmwẹ iran.

⁴ Wẹ ọrọre ọba mwẹ kevbe Osanobua mwẹ wẹ ọ re ọ rhie akhọnmiotọ ne emwa ruẹn.

⁵ Ẹtin ruẹn ọ re ima ya khọn eghian mwa muotọ.

⁶ Mẹ ma mu ẹtin yan uhanbọ mwẹ ra umozo mwẹ ne ọ miẹn mwẹ fan;

⁷ sokpan, wẹ miẹn ima fan vbe obọ avbe eghian mwa nẹ u keghi vbe khọn iran ni khuiwu mwa muotọ.

⁸ Ma gha rho ruẹ vbe ẹghẹ hia ma ghi vbe gha rhie ekpọnmwẹ nuẹn rhinrin ẹdẹ.

⁹ Sokpan, banbanna nian, wẹ he ima ye otọ nẹ, u na gie iran khọn miẹn ima otọ uma ghi lele ivbi iyokuo ima ghe usun ladian.

¹⁰ U gie ima lẹ ne avbe eghian mwa iran keghi viọ emwi ni te re ọghe ima, ye khian ọghe iran.

¹¹ U gie iran lọkọ ima an zẹvbe ohuan u zagha ima kua lele ẹvbo ẹrrẹe.

¹² U khiẹnnẹ emwa ruẹn ọpuẹkẹ kua vbene a miẹn wẹ ive tunnẹ ọre u tie ye iran uhunmwu.

¹³ Avbe ẹdogbo mwa, miẹn vbene u ru ima hẹ iran kegha ta mwa giẹ iran na gha giẹ mwa.

¹⁴ U ya ima khian emwi igbogiẹ vbe uwu ẹbu agbọn ẹvbo nibun iran gha fieghe uhunmwu iran da ima vbe ọghe ozan.

¹⁵ Uwu efaa ọ re I ye vbe ẹghẹ hia ekhue gba mwẹ egbe hia.

¹⁶ Vbe I gha miẹn ihue ozan ne iran vin yọmwẹ akhọe; ighe avbe eghian mwẹ kevbe iran ni khuiwu mwẹ.

¹⁷ Ena hia ọ re ọ sunu vbe egbe mwa a gha rhe miẹn ighe ma ma mianmian an ra ne ima rra ile ne u gu ima ta.

¹⁸ Ma ma he fi owẹ dọn ghe ruẹ ma ma he rra iyi ne u yi.

¹⁹ Sevba, u sẹ ima rae ye uwu ẹbu aranmwẹ oha vbe egbe fu ima nẹ u keghi sẹ mwa rae ye uwu ebiebi, ne ọ so kankan an kan.

²⁰ Adeghẹ te ima dobọ Osanobua mwa ne a ga yi, ma na ya gha na erhunmwu ghe ẹbọ ẹrrẹe,

²¹ wẹ gha wa gualọ ẹe miẹn nẹ, rhunmwuda, wẹ rẹn iro ẹkhokho ekhọe mwa.

²² Sokpan, rhunmwuda ruẹ, ọ re ima na khian ne a ghi gbele ua vbe ẹghẹ hia ne a na ru ima zẹvbe ohuan ne a ra gbele ua.

²³ Rhiọrre, Nọyaẹnmwa, vbọzẹ ne u na vbiẹ yi? Guọnmwẹ egbe kpaegbe; ghẹ he ima ye otọ rhinrin ẹdẹ.

²⁴ Vbua ghi na rhie aro lẹre ne ima hẹ yi? Ghẹ mianmian oya kevbe ukpokpo mwa.

²⁵ Ma dele a keghi lọkọ ima ginna otọ ma lovbiẹ ye uwu ebubẹ ne a gbele ima yi.

²⁶ Gha dee do yi ima obọ rhunmwuda ahoẹmwọmwa ruẹn ne ẹ i beghe miẹn mwa fan.