Psalm 42 - Edo Bible (E Baibol Ẹdo) Version 1996

EBE NE OGIEVA ( Psalm 42—72 ) Erhunmwu Ọmwa Ne Ọ Rre Iwe

¹ Vbene ẹrhuẹ yan gualọ ẹzẹ amẹ ne ọ furre, erriọ ekhọe mwẹ yan gualọ ọ Osanobua.

² Ohanmwẹ amẹ ruẹn gbe mwẹ, Osanobua ne ọ rrọ de ẹghẹ ni I gha ya yo ne I do ga vbe odaro ruẹ?

³ Asọn kevbe avan ọ re I ya viẹ egbe, ameve ọkpa ọrọre evbare mwẹ ẹghẹ hia, avbe eghian mwẹ ghi gha nọ mwẹ wẹẹ, “Osanobua ruẹ vbọ?”

⁴ I gha ye ẹghẹ ne ọ gberra rre, ekhọe mwẹ ghi rhia. Ẹghẹ ne I na lele emwa nibun ye owa Osanobua. Mẹ ghi ke odaro ne iran, vbe iran a gha khian. Emwa nibun ne ẹko rhiẹnrhiẹn, iran ghi gha so ihuan, iran ghi vbe go wan Osanobua.

⁵ Vbọzẹ yi ne ekhọe mwẹ na rhia vbenian? Vbọzẹ ne orhiọn mwẹ ma na sẹ otọ? I gha hẹnhẹn idaehọ mwẹ yan Osanobua I gha vbe dọlegbe rho ẹre ọmiọnmwafan mwẹ kevbe Osanobua mwẹ.

^6-7 Te udu mwẹ ghi ra kpaẹn vbe ehe ne I na rre iwe rhunmwuda ọnii, mẹ keghi werriẹ iro mwẹ da irẹn. Ọ gie ubimwẹ amẹ ọghe akhiẹ gie orhiọn mwẹ. Ke uhunmwu Oke Hẹmọn kevbe Oke Miza gha dee.

⁸ E Nọyaẹnmwa, ne ọ gie aho ẹmwẹ ọmwa rẹn ne ẹ i beghe rhie egbe maa vbe ẹghẹ avan. Ne i miẹn ehe ne miẹn ihuan so vbe asọn, erhunmwu ghe Osanobua ẹdagbọn mwẹ.

⁹ Mẹ tama Nọyaẹnmwa ne ọ gbinna mẹ wẹẹ, “Vbọzẹ ne u na mianmian mwẹ? Vbọzẹ ne I gha na gha rrioya vbe obọ ekhọe dan ọghe avbe eghian mwẹ?”

¹⁰ Ihẹn ne iran tie mẹ rẹnkhẹn mwẹ uan Vbene iran na nọ mwẹ yan egbe wẹẹ, “Osanobua ruẹ vbọ?”

¹¹ Vbọzẹ yi, ne ekhọe mwẹ na rhia vbenian vbọzẹ ne orhiọn mwẹ ma na sotọ I gha hẹnhẹn idaehọ mwẹ yan Osanobua I gha vbe dọlegbe rho ẹre, ọmiọnmwafan mwẹ kevbe Osanobua mwẹ.