Psalm 40 - Edo Bible (E Baibol Ẹdo) Version 1996

Ihuan Urhomwẹ

¹ I hẹko ya izin egbe mudia khẹ iyobọ e Nọyaẹnmwa rẹn keghi danmwehọ, ọ kevbe họn urhu eve mwẹ.

² Ọ si mwẹ ke uwu uye dan ladian hin uwu odin amẹ ekhae ne ọ gbe ọmwa an. Ọ mu mwẹ mudia yan uhunmwu okuta vbe ne ai na mwẹ ẹbe, ọ keghi gbe mwẹ ẹkun sẹ otọ.

³ Ọ ma mwẹ ihuan ọgbọn ne I gha so ihuan urhomwẹ ghe Osanobua mwa. Emwa nibun gha miẹn ọna wan, iran ghi mu ẹtin iran, yan e Nọyaẹnmwa.

⁴ Afiangbe ọrọre ọghe iran ni mu ẹtin yan e Nọyaẹnmwa ni ma gbee ghe ọghe ẹbọ ra ne iran kegbe ba iran ni ga ẹbọ ohoghe.

⁵ U ru emwi nibun ne ima nẹ Nọyaẹnmwa Osanobua mwa; ọmwa ne ọ yevbe uwẹ rrọọ! Emwamwa ọyunnuan nibun ọ re u ru ye otọ khẹ ima. Mẹ ira sẹtin talọ ehia iran mobọ bun ẹsẹsẹmwẹse.

⁶ Wẹ ẹi gualọ ese ra imuohan; u ma vbe nọ aranmwẹ ne a giẹn ọ re ohoho vbe aka ra ne a ya zọese ne ọ kpe orukhọ kua. Sokpan, wẹ keghi rhie ehọ mẹ ne I ya gha họn ẹmwẹ ruẹn.

⁷ Rhunmwuda ọnii, mẹ keghi wanniẹn wẹẹ, “Ghe mwẹ vbe emwana emwi ne u tama mwẹ hia rre uwu nene ẹbe uhi.

⁸ U miẹn vbe iho ruẹ ne a ru yẹ mwẹ hẹ Osanobua mwẹ! I rhie iruẹmwi ruẹn ye uwu ekhọe mwẹ.”

⁹ Vbe ehe ne avbe emwa ruẹn na si koko Nọyaẹnmwa mẹ keghi na iyẹn nọma ni wẹ, wẹ ọ re ọ miẹn mwa fan. Wẹ rẹnrẹn wẹ mẹ i ra dobọ ẹre ne a ta yi.

¹⁰ Mẹ ma rhie iyẹn imiẹnfan nii hinrre ne egbe mwẹ ọkpa, ẹghẹ hia ọ re I ya na iyẹn ọghe ne uwẹ na gia mu ẹtin yan kevbe iyobọ ruẹ. Vbe ehe ne avbe emwa ruẹn na si koko, I ma he dobọ ẹre yi ne a ta ighe aguobọmwa ọwuẹ kevbe ahoẹmwọmwa ruẹn ne ẹi beghe.

¹¹ Nọyaẹnmwa, mẹ rẹnrẹn ighe wẹ i ra dobọ itohan ruẹn ghe mwẹ yi. Ahoẹmwọmwa kevbe aguobọmwa ọwuẹ, ọ re ọ khian rhie mwẹ lẹre vbe ne ai na mwẹ ẹbe.

Erhunmwu Ne Iyobọ

¹² Orueghe nibun lẹga mwẹ ọ bun gbe, a i sẹtin ka ẹe. Obọ orukhọ mwẹ vba mwẹ, mẹ i ghi sẹtin bẹghe, iran bun sẹ eto ne uhunmwu mwẹ ẹtin fo mwẹ nẹ.

¹³ Nọyaẹnmwa, miẹn mwẹ fan do yọmwobọ nian.

¹⁴ Te obọ gha ke ukhunmwu ne iran ni ho ne iran gbe mwẹ uan te iro gha han iran. Iran ni ghọghọ ye ọlọghọmwa ne I ye, te a gha khulo iran werriegbe ne avbe fa iran an.

¹⁵ Iran ni ya mwẹ gbogiẹ te obọ gha vba iran ne iran gha ghe gbọọ.

¹⁶ Iran hia ni bu ruẹ rre te iran gha ghọghọ ne iran vbe gha sẹ ọyẹnmwẹ te iran hia ni kpọnmwẹ ye imiẹnfan ruẹn gha kha wẹẹ, “U miẹn vbe Nọyaẹnmwa kpọlọ hẹ!”

¹⁷ Ovbiogue kevbe nọ ma wegbe ọ re imẹ khin Nọyaẹnmwa. Sokpan, wẹ ma he mianmian mwẹ. Wẹ ọrọre ọmiọnmwafan mwẹ kevbe Osanobua mwẹ zẹgiẹgiẹ do yọmwẹ obọ.