Psalm 4 - Edo Bible (E Baibol Ẹdo) Version 1996

Erhunmwu Ota Ọghe Iyobọ

¹ Họn urhu mwẹ vbe i a gha na erhunmwu Osanobua ne ọ gbinna mẹ. Ẹghẹ ne I na gha rre uwu ukpokpo, wẹ ọ re ọ yọmwẹ obọ. Tohan mwẹ nian, ne u vbe họn erhunmwu mwẹ.

² Inu ẹghẹ, ọre uwa na ra ya gha rhovbiẹ mwẹ yi? Inu ẹghẹ wa ra ho ẹmwẹ emwi ẹwobi sẹ? Ne uwa gha na vbe gha lele ohoghe khian?

³ Wa yerre wẹ, e Nọyaẹnmwa zẹ ọmwa ẹmwata ya ru ọghọe nẹ, ọ vbe họn urhu mwẹ vbe I gha kpe tie ẹre.

⁴ Wa gha guọ ne ohan, ne uwa dobọ orukhọ ne a ru yi. Wa kakabọ mu ọna ro, vbe uwa hẹko lovbiẹ ye ukpo uwa.

⁵ Wa zọ ese ne ọ kere ghe Nọyaẹnmwa ne uwa mu ẹtin uwa yan rẹn.

⁶ Emwa nibun ọ re ọ na erhunmwu wẹẹ, “Rhie afiangbe ba afiangbe ne ima Nọyaẹnmwa Ye aro itohan ghe mwa!”

⁷ Sokpan, oghọghọ ne uwẹ rhie mẹ nẹ, kpọlọ sẹ ne iran gha sẹtin miẹn ẹdẹdẹmwẹdẹ, egbe ne iran rhe ya mwẹ ọka kevbe ayọn.

⁸ I gha lovbiẹ, I ghi vbiẹ ua vbe ọfumwegbe wẹ ọkpa kẹkan, Nọyaẹnmwa, ọre ọ rhie mwẹ lẹre vbe ne a i na mwẹ ẹbe.