Psalm 39 - Edo Bible (E Baibol Ẹdo) Version 1996

Imiẹnkue Ọmwa Ne Oya Re

¹ Mẹ khare wẹẹ, “I gha ya ẹwaẹn gha ru emwi, mẹ i ra vbe gie aranmwẹ mwẹ ya mwẹ ru orukhọ mẹ i ra vbe guan ẹmwẹ rhọkpa vbe avbe emwa dan ra sikẹ mwẹ.”

² Mẹ wa hunwan, vbene I ma na ta ifiẹmwẹ ọkpa kẹkan, uhin yasẹ vbe ekpa emwi ne ọ maa! Sokpan, te oya ne I re ye gha khọrhiọn sayọ.

³ Ohawa keghi gbe mwẹ fi otọ vbene I ya muẹn ro, erriọ ọ re ẹko mwẹ ya rhia yọ; I ma ghi sẹtin hunwan ọ re I na nọ wẹẹ:

⁴ “Nọyaẹnmwa, vbe I a ra tọ sẹ hẹ yi? De ẹghẹ ne I gha ya wu? Tama mwẹ, vbene ẹdẹ uwu sikẹ otọe hẹ.”

⁵ A miẹn vbene u ru ẹdẹ agbọn mwẹ kanmwa hẹ! Ẹdagbọn mwẹ i zẹdẹ mwẹ esa vba aro ruẹ. Vbẹmwata ọmwa nagbọn ma vbe sẹẹ, ẹhoho ne ọ rhie gberra khian.

⁶ Ọ ma vbe gberra aghọnghọn, emwi ne ọ ru kẹkan ehia khin, ọ si ẹfe koko, ọ ma vbe rẹn ọmwa ne ọ gha viọ ẹre.

⁷ Nọyaẹnmwa, demwi ne I gha ye rhie aro yi yi? Idaehọ mwẹ rre ehe ne uwẹ ye.

⁸ Miẹn mwẹ fan vbe obọ orukhọ mwẹ hia ghẹ vbe gie avbe akpa ya mwẹ gha gbogiẹ.

⁹ I gha hẹko hunwan, mẹ i ra vbe ta ẹmwẹ ọkpa rhunmwuda, wẹ ọ re ọ si oya ne I re na yọmwẹ egbe.

¹⁰ Ghẹ ghi rriọmwẹ oya sẹ ọna. Te avbe emwi ne u fi mwẹ re ghi ra gbe mwẹ uan.

¹¹ Ẹzọ ne u gu ọmwa gui, ọ re u ya rri ọmwa oya ye orukhọ ne ọ ru. U ghi vbe fuẹn emwi ne ọ te ye ọre ua zẹ vbene arriukpa rri emwi. Vbe ẹmwata, ọmwa ma maa sẹẹ ẹhoho ne ọ rhie gberra khian.

¹² Họn erhunmwu mwẹ Nọyaẹnmwa ne u vbe rhie ehọ ye eve mwẹ larre ne u do yọmwẹ obọ vbe I a gha viẹ. Ẹghẹ kherhe ọ re I mwẹ ne I gha ya vbe ehe ne u ye. Zẹ vbene avbe erha mwẹ odede vbe ye.

¹³ Rhie obọ hin mwẹ ẹkun rre, ne I vbe fanmwegbua kherhe, a te do miẹn wẹ, I kpao gha rriẹ vbene a i ghi na miẹn mwẹ ọvbehe.